ჯანდაცვის მინისტრის, ეკატერინე ტიკარაძის თქმით, ვაქცინაციის მსურველთა დაბალ აქტივობას მწვავედ არ აფასებენ, რადგან მსგავსია სხვა ქვეყნების პრაქტიკაც.

"ჩვენ გვაქვს არაერთი ქვეყნის პრაქტიკა, სადაც ვაკვირდებოდით ვაქცინაციის დაწყების პერიოდში, საკმაოდ დაბალ აქტივობას. აქედან გამომდინარე, ჩვენ ამას მწვავედ არ ვაფასებთ. მივყვებით იმ ჩვენს გეგმას, რომელიც იყო დასახული და ეტაპობრივად პროცესი უფრო მეტად აქტიური გახდება", — განაცხადა ტიკარაძემ.

ტიკარაძემ ხაზგასმით აღნიშნა ისიც, რომ ვაქცინაცია იქნება ნებაყოფლობითი და სამინისტრო ვაქცინირებულთა რიცხვის გასაზრდელად მის ვალდებულებაზე არ მსჯელობს.

დღეს, ტიკარაძემ, ასევე დააანონსა, რომ ხვალიდან გეგმავს რეგიონების კლინიკების მონახულებას და სამედიცინო პერსონალთან "ინტენსიურ გასაუბრებებს" ვაქცინაციაზე.

დაავადებათა კონტროლისა და საზოგადოებრივი ჯანდაცვის ეროვნულმა ცენტრის (NCDC) ინფორმაციით, 22 მარტის მონაცემებით, უკვე აცრილია ჯანდაცვის სექტორში მომუშავე 3 843 ადამიანი.

გაიგეთ მეტი: