ფორმულას ინფორმაციით, სკოლის მოსწავლეებს შორის მომხდარი ჩხუბის შემდეგ, ორმა ბიჭმა კლასელი დააჩოქა და ბოდიშის მოხდა ამ ფორმით მოსთხოვა. მოგვიანებით, საქმეში ამ ბიჭის ბებია ჩაერთო და ბავშვებს, რომლებმაც მას ბოდიშის მოხდა აიძულეს, იმავე ფორმით მოახდევინა ბოდიში. ეს ყველაფერი ვიდეოზეა დაფიქსირებული.

ვიდეოში, რომელიც, სავარაუდოდ, დედამ გადაიღო, ჩანს, რომ ქალი ბავშვებს შეურაცხყოფას აყენებს.

"თუ ვერ იტირებთ, თვალებს გამოგთხრით და მაინც აგატირებთ", — ეუბნება ქალი ბავშვებს.

საქართველოს ერთ-ერთ რეგიონში მოსწავლეებზე არაადამიანური მოპყრობის ფაქტს შინაგან საქმეთა სამინისტრო 2020 წლის ნოემბრის თვიდან იძიებს.

შსს-ში On.ge-ს განუცხადეს, რომ მომხდარზე გამოძიება სისხლის სამართალის კოდექსის 144-ე მე-3 პრიმა მუხლით მიმდინარეობს, რაც დამამცირებელ ან არაადამიანურ მოპყრობას გულისხმობს. თუმცა, სხვა დეტალებზე გამოძიების ოთხთვიანი მიმდინარეობის მიუხედავად უწყებაში არ საუბრობენ.

მედიაში ინფორმაციის გავრცელებიდან მეორე დღეს, 20 მარტს პროკურატურამ განცხადება გაავრცელა. როგორც უწყებაში ამბობენ, შემთხვევა ბავშვებს შორის 4 ნოემბერს მოხდა, ხოლო ბებიამ ბოდიშის მოხდა არასრულწლოვნებს 8 ნოემბერს აიძულა, რასაც ერთ-ერთი მშობელი იღებდა.

პროკურატურაში აცხადებენ, რომ ბებიას ბრალდება საქართველოს სისხლის სამართლის კოდექსის 150-ე მუხლის მეორე ნაწილის "ა" ქვეპუნქტით წარუდგინეს, რაც ადამიანისთვის ქმედების თავისუფლების უკანონო შეზღუდვას გულისხმობს. აღნიშნული მუხლი სასჯელის სახედ და ზომად თვრამეტ თვემდე თავისუფლების აღკვეთას ითვალისწინებს.

უწყებაში არ აზუსტებენ, როდის წარადგინეს ბრალი, თუმცა აღნიშნავენ, რომ ბრალდებულისთვის აღკვეთის ღონისძიების შეფარდების შუამდგომლობით სასამართლოს კანონით დადგენილ ვადაში მიმართავენ.