დაავადებათა კონტროლის ეროვნული ცენტრის ხელმძღვანელის, ამირან გამყრელიძის თქმით, ახალციხეში ექთანს ასტრაზენეკას ვაქცინით აცრის შემდეგ, სავარაუდოდ, ანაფილაქსიური რეაქცია განუვითარდა.

"დღეს ახალციხეში, იმედის კლინიკაში, რომელიც აწარმოებს აცრებს და აცრილი ჰყავს დაახლოებით 16 ადამიანი, 12:15 წუთზე აიცრა ჩვენი კოლეგა, სამედიცინო პერსონალი, 27 წლის ქალბატონი. რომელიც როგორც ვიცი ანამნეზით, სისტემატურად იტარებდა გრიპის საწინააღმდეგო აცრას და ასევე არ აღნიშნავდა ანამნეზში ალერგიულ რეაქციებს. ამ აცრის შემდეგ ამ ქალბატონმა მისცა ერთ-ერთ არხს ინტერვიუ და მოუწოდა სამედიცინო პერსონალს აცრების გააქტიურებისკენ. სამწუხაროდ, 30 წუთში განვითარდა დაუყოვნებელი რეაქცია. ჩვენ ჯერ არ ვიცით ეს იყო ალერგიული თუ სხვა ტიპის რეაქცია, თუმცა ექიმებთან წინასწარი საუბრით, ეს უფრო ჰგავდა ანაფილაქსიურ რეაქციას", — განაცხადა მან.

დღეს, 18 მარტს გავრცელდა ინფორმაცია, რომ ახალციხეში ექთანი AstraZeneca-ს ვაქცინის გაკეთების შემდეგ კომაში ჩავარდა. ადგილობრივი მედიების ინფორმაციებით, ამ ფაქტს დაპირისპირება მოჰყვა და ახლობლებმა კლინიკის მინები ჩაამტვრიეს. ადგილზე მობილიზებულია პოლიცია.

ბრიფინგზე ჯანდაცვის მინისტრის მოადგილემ და NCDC-ის დირექტორმა აღნიშნეს, რომ, შესაძლოა, ეს იყოს ვაქცინის გვერდითი ეფექტი, თუმცა ამის დასადგენად მიმდინარეობს კვლევა. მათი თქმით, ექთნის მდგომარეობა მძიმეა და თბილისში, რეანიმაციულ განყოფილებაში გადაჰყავთ.

გაბუნიამ აღიშნა ისიც, რომ ასტრაზენეკას ვაქცინას მსგავს გვერდით რეაქცია აქვს უკვე დაფიქსირებული — ბრიტანეთის მონაცემებით, 5 მილიონი შემთხვევიდან 41 იყო მსგავსი ანაფილაქსიური გვერდითი რეაქცია. მანვე აღნიშნა, რომ ვაქცინის რისკი მის სარგებელთან შედარებით ყოველთვის ნაკლებია.