ჯანდაცვის მინისტრის, ეკატერინე ტიკარაძის განცხადებით, საპატრიარქო არ ჩაერთვება ვაქცინაციის პროპაგანდაში, მაგრამ ჯანდაცვის სამინისტროს ყველა გონივრულ ნაბიჯს მესალმება. ამის შესახებ მან საქართველოს პატრიარქთან შეხვედრის შემდეგ ისაუბრა.

"შეხვედრის მიზანი იყო მისი ინფორმირება დეტალურად, თუ როგორ მიმდინარეობს ქვეყანაში ეპიდვითარება და როგორ არის დაგეგმილი ვაქცინაციის პროცესი, რას მოიცავს ვაქცინაცია, რა რისკები და დადებითი შედეგები შეიძლება ჰქონდეს ჩვენი მოქალაქეებისთვის.

მათი მხრიდან აღქმულია ის პრობლემები, რაც გლობალურად გააჩნია სამყაროს პანდემიასთან მიმართებაში და საპატრიარქო მიესალმება ყველა იმ გონივრულ გადაწყვეტილებას ჯანდაცვის სამინისტროს მხრიდან, რაც იქნება გადადგმული ჩვენი მოქალაქეების ჯანმრთელობის უსაფრთხოების დასაცავად", — თქვა მან.

ტიკარაძის განცხადებით, ილიამ მეორეს განწყობაა, რომ ვაქცინაცია იყოს ნებაყოფლობითი. მისი თქმით, პატრიარქთან გაიარეს დეტალები, რომ ვაქცინის უსაფრთხოებასა და სარგებელთან დაკავშირებით მოქალაქეების ინფორმირება მნიშვნელოვანია.

დღეს, 18 მარტს ჯანდაცვის მინისტრი, ეკატერინე ტიკარაძე საქართველოს კათოლიკოს პატრიარქს, ილია მეორეს შეხვდა.

16 მარტს, დაავადებათა კონტროლისა და საზოგადოებრივი ჯანდაცვის ეროვნული ცენტრის ხელმძღვანელმა, ამირან გამყრელიძემ საპატრიარქოს მიმართა და ვაქცინაციის პროცესში თანამშრომლობა სთხოვა. გამყრელიძის თქმით, მოსახლეობას ექიმებზე მეტად სასულიერო პირების სჯერა, ამიტომ, სთხოვს მათ, ვაქცინაციის პროცესს მხარი დაუჭირონ.

17 მარტს, გამყრელიძეს საპატრიარქოს პრესსამსახურის ხელმძღვანელმა, დეკანოზი ანდრია ჯაღმაიძე ასე უპასუხა: "ეკლესია პასუხისმგებლობას ვერ აიღებს ვაქცინაციის პროპაგანდასთან მიმართებაში, რადგან ეს ჯანდაცვის მუშაკთა კომპეტენცია და პასუხისმგებლობაა".

ამის შემედეგ, ამირან გამყრელიძემ განაცხადა, რომ ესაუბრა მაღალი იერარქიის სასულიერო პირებს და მზადაა მათ კითხვებს უპასუხოს.

აღსანიშნავია, რომ რამდენიმე დღის წინ, ჯანდაცვის ყოფილმა მინისტრმა და საპარლამენტო უმრავლესობის წევრმა, დავით სერგეენკომ მოსახლეობას მოუწოდა, ვაქცინაციაზე მსჯელობისას მხოლოდ დარგის სპეციალისტებს და პროფესიონალებს მოუსმინონ.

გაიგეთ მეტი: