საქართველოს პრეზიდენტმა, სალომე ზურაბიშვილმა კორონავირუსის წინააღმდეგ ვაქცინა პირდაპირ ეთერში გაიკეთა.

მისვლისას პრეზიდენტმა ექიმების მიერ დასმულს კითხვებს უპასუხა, რის შემდეგაც ვაქცინა გაიკეთა.

"ეს იყო და ეს?" — იკითხა პრეზიდენტმა ვაქცინის გაკეთების შემდეგ. გარდა ამისა, მან იკითხა შეეძლო თუ არა ალკოჰოლის მიღება, რადგან დღეს, 18 მარტს მისი დაბადების დღეა, რაზეც უპასუხეს, რომ თავი უნდა შეიკავოს.

"ჩამიშალეთ დაბადების დღე", — იხუმრა სალომე ზურაბიშვილმა

15 მარტს საქართველოში კორონავირუსის წინააღმდეგ ვაქცინაცია დაიწყო. დაავადებათა კონტროლის ცენტრის ხელმძღვანელის მოადგილე, პაატა იმნაძე ერთ-ერთი პირველი იყო, ვინც ვაქცინა საჯაროდ გაიკეთა. მის გარდა, აიცრნენ ინფექციური საავადმყოფოს ექიმები, მათ შორის, მარინა ეზუგბაია და მარინა ენდელაძე.

საქართველოში AstraZeneca-ს ვაქცინის 43 200 დოზა შაბათს, 13 მარტს შემოვიდა და ის განკუთვნილია სამედიცინო პერსონალისთვის. შემდეგი ეტაპია ხანგრძლივი მოვლის დაწესებულებების ბენეფიციარებისა და პერსონალის აცრა, ამის მერე კი, ვაქცინას 75 წელზე მეტი ასაკის ადამიანებს გაუკეთებენ.

ვაქცინაციისთვის ქვეყანაში შერჩეულია 82 დაწესებულება, თუმცა პირველ ეტაპზე პროცესი 29 ცენტრში დაიწყება და კვირის განმავლობაში ახალი ამცრელი პუნქტები დაემატება.

ჯანდაცვის მინისტრმა, ეკატერინე ტიკარაძემ 11 მარტს განაცხადა, რომ საწყის ეტაპზე აიცრება 43 200 ადამიანი და რადგან ეს ვაქცინა 2 დოზით კეთდება, მეორე დოზას აცრილები გაიკეთებენ მაშინ, როცა დამატებითიც შემოვა. მისი თქმით, იციან დროის მონაკვეთი, როცა გარანტირებულად მიიღებენ მეორე დოზებს და აქვთ დასტური, რომ შემოტანა გარანტირებულად მოესწრება.

გაიგეთ მეტი: