ნაციონალური მოძრაობის თავმჯდომარის, ნიკა მელიას მხარდასაჭერად, პარტიის წევრებმა და სამოქალაქო აქტივისტებმა თბილისიდან რუსთავის ციხემდე მანქანებით მორიგი მსვლელობა გამართეს.

"ერთი თვეა გახდება მალე, რაც ნიკა მელია პოლიტიკური მძევალია ბიძინა ივანიშვილის. დღევანდელი ჩვენი აქციით გვინდა ვუთხრათ როგორც ქართულ ოცნებას, ასევე ყველა ჩვენ საერთაშორისო პარტნიორს, რომ საქართველო არ შეეგუება ქვეყანაში პოლიტპატიმრების არსებობას.

ჩვენ ვიბრძოლებთ იმისათვის, რომ პოლიტპატიმრებამა დატოვონ ციხეები და ეს ქვეყანა ერთხელ და სამუდამოდ მივიყვანოთ იმ არჩევნებამდე, რომელის მიმართაც არ გაჩნდება კითხვები", — განაცხადა ზაალ უდუმაშვილმა, ნაციონალური მოძრაობის ერთ-ერთმა ლიდერმა.

რუსთავში ჩასვლამდე, აქციის მონაწილეები შინაგან საქმეთა სამინისტროს შენობასთან შეჩერდნენ. მათ სამინისტროს შენობის მიმდებარედ, ასფალტზე ბიძინა ივანიშვილის გამოსახულებით სტიკერების დაკვრა უნდოდათ, რასაც პოლიციასთან დაპირისპირება მოჰყვა. თუმცა, საბოლოოდ მათ მისცეს სტიკერების დაკვრის საშუალება.

მელიას მხარდასაჭერი მსვლელობა აქამდეც გაუმართავთ აქტივისტებსა და ნაციონალური მოძრაობის მხარდამჭერებს. მელია თითქმის ერთი თვის წინ, 23 თებერვლს, საკუთარი კაბინეტში, სპეცრაზმის დახმარებით დააკავეს.

სპეცრაზმი ნაციონალური მოძრაობის შენობაში შევიდა როგორც სახურავიდან, ისე პირველ სართულზე არსებული შესასვლელებიდან. თავდაპირველად, მათ პირველ სართულზე მყოფი ადამიანები გამოიყვანეს, მოგვიანებით კი, ნიკა მელიას ოთახს მიადგნენ, სადაც ის ოპოზიციის სხვა ლიდერებთან და მხარდამჭერებთან ერთად იმყოფებოდა. მათ ოთახში გამოიყენეს გაზიც. შსს-ს ინფორმაციით, მელიას გარდა, დღეს 21 ადამიანი დააკავეს. მათ პოლიციის კანონიერი მოთხოვნისადმი დაუმორჩილებლობას ედავებიან.

გაიგეთ მეტი: