პარლამენტის თავმჯდომარის მოადგილე და ჯანდაცვის ყოფილი მინისტრი, დავით სერგეენკო განმარტავს, რომ არსებული პროტოკოლი ითვალისწინებს მოქმედი სამედიცინო პერსონალის აცრას, თუმცა, ამატებს, რომ თუ მისი, როგორც პოლიტიკური ფიგურის აცრა მნიშვნელოვანი იქნება მოსახლეობის მოტივაციისთვის, თავადაც აიცრება.

"არსებული პროტოკოლი ითვალისწინებს მოქმედი სამედიცინო პერსონალის აცრას, მათ, ვისაც პაციენტებთან აქვს შეხება. პოლიტიკური ფიგურების ჩართვა, ალბათ მნიშვნელოვანი იქნება, ერთგვარი კამპანიური აქტივობისთვის [...]

ჩემი რიგი ჯერ არ არის. მე აქტიური, მოქმედი ექიმი აღარა ვარ, სამწუხაროდ. თუ აღმოჩნდება, რომ რაღაცის გამო ნაკადი უფრო დაბალი იქნა და ჩემი აცრა იქნება მნიშვნელოვანი მოტივაციისთვის, აქვე, თუ გნებავთ, ამ ტრიბუნასთან გავიკეთებ ამ აცრას", — განაცხადა დავით სერგეენკომ.

მისი თქმით, იგივე ლოგიკა მოქმედებს ჯანდაცვის მოქმედ მინისტრზე ეკატერინე ტიკარაძეზე.

"ის მოქმედი ექიმი აღარ არის და თავისი რიგი დაუთმო მოქმედ ექიმებს, ექთნებს და იქ მომუშავე ადამიანებს", — ამბობს სერგეენკო.

საქართველოში მედპერსონალის ვაქცინაცია AstraZeneca-ს ვაქცინით 15 მარტიდან დაიწყო. დაავადებათა კონტროლის ცენტრის ხელმძღვანელის მოადგილე, პაატა იმნაძე ერთ-ერთი პირველი იყო, ვინც ვაქცინა საჯაროდ გაიკეთა. მის გარდა, აიცრნენ ინფექციური საავადმყოფოს ექიმები, მათ შორის, მარინა ეზუგბაია და მარინა ენდელაძე.

საზოგადოებაში გაჩნდა კითხვები, რატომ არ იკეთებენ ვაქცინას ჯანდაცვის მინისტრი ეკატერინე ტიკარაძე. მან განაცხადა, ვაქცინას სხვებს უთმობს. იგი, ასევე, დაინტერესდა, სხვა ვაქცინების შემთხვევაშიც გახდება თუ არა საჭირო საჯარო ცნობადი სახეების ვაქცინაცია მოსახლეობის მოტივაციისთვის.

დაავადებათა კონტროლის ეროვნული ცენტრის ინფორმაციით, პირველივე დღეს AstraZeneca-ს ვაქცინა 668 ადამიანმა გაიკეთა. ამასთან, 15 მარტის 20:00 საათის მონაცემებით, ვაქცინაციისთვის 4 202 მედპერსონალი დარეგისტრირდა .

საქართველოში AstraZeneca-ს ვაქცინის 43 200 დოზა შაბათს, 13 მარტს შემოვიდა და ის განკუთვნილია სამედიცინო პერსონალისთვის. შემდეგი ეტაპია ხანგრძლივი მოვლის დაწესებულებების ბენეფიციარებისა და პერსონალის აცრა, ამის მერე კი, ვაქცინას 75 წელზე მეტი ასაკის ადამიანებს გაუკეთებენ.

ვაქცინაციისთვის ქვეყანაში შერჩეულია 82 დაწესებულება, თუმცა პირველ ეტაპზე პროცესი 29 ცენტრში დაიწყება და კვირის განმავლობაში ახალი ამცრელი პუნქტები დაემატება.

გაიგეთ მეტი: