თბილისში ტრანსპორტში ბილეთის აღებიდან 1,5 საათის განმავლობაში უფასო მგზავრობა მიკროავტობუსითაც იქნება შესაძლებელი. ამის შესახებ თბილისის მთავრობის სხდომაზე, მერმა კახა კალაძემ განაცხადა.

როგორც მერმა განმარტა, ახალი სისტემა ჯერჯერობით იმ სამას მიკროავტობუსზე იმუშავებს, რომელიც დედაქალაქის მუნიციპალიტეტს შემოჰყავს. მომავალში კი ის დანარჩენ 700 მიკროავტობუსზეც გავრცელდება, რომელთა შემოყვანაც შემოდგომისთვის იგეგმება.

ამასთან, პირველი აპრილიდან ის მოქალაქეები, რომლებიც ავტობუსსა და მეტროში შეღავათიანი ტარიფით სარგებლობდნენ, მსგავსი ტარიფით იმგზავრებენ მიკროავტობუსებშიც.

თბილისის მერის, კახა კალაძის განცხადებით, სატრანსპორტო რეფორმა, რომელიც მოიცავს საზოგადოებრივი ტრანსპორტის განახლებას, საგზაო ინფრასტრუქტურის მოწყობას და ახალი სამარშრუტო ქსელის განვითარებას, 2023 წლისთვის დასრულდება.