ქართული ოცნების ყოფილი პიარტექნოლოგი, ლაშა ნაცვლიშვილი ადასტურებს, რომ ტელეკომპანია POSTV დატოვა. ის არ წერს, როდის მიიღო ეს გადაწყვეტილება, თუმცა აღსანიშნია, რომ ტელევიზიას დაახლოებით 1 თვის წინ, 21 თებერვალს დაუბრუნდა.

"გარწმუნებთ, პოსტივიდან ჩემი წამოსვლით შინაარსობრივად არაფერი შეიცვლება, რადგან მუდამ ვიყავი, ვარ და ყოველთვის ვიქნები ბიძინა ივანიშვილის მიერ შექმნილი პოლიტიკური მოძრაობის საჯარო და აქტიური მხარდამჭერი და 2012 წლის 1 ოქტომბრის იდეალების ერთგული. ასე რომ, ჩვეული შემართებით, ოღონდ განსხვავებულ ამპლუაში ვაგრძელებ ბრძოლას. ნუ ცქმუტავთ, დამშვიდდით, დაიოკეთ ნერვები და დაელოდეთ!" — წერს ის ფეისბუქგვერდზე.

ნაცვლიშვილი მცირეხნიან დაბრუნებამდეც მუშაობდა POSTV-ში და აღმასრულებელი დირექტორის პოსტს იკავებდა, ასევე, იყო წილის მფლობელიც. თუმცა 2020 წლის საპარლამენტო არჩევნებისთის ქართული ოცნების საზოგადოებასთან ურთიერთობის მრჩევლად გადაინაცვლა. ამ თანამდებობიდან წამოსვლის შემდეგ კი ზუსტად 21 დღის წინ POSTV-ში დაბრუნდა.