დღეს, 13 მატს ჯანდაცვის მინისტრმა და NDCD-ის დირექტორმა სამედიცინო სფეროს წარმომადგენლებს ვაქცინაციის პროცესში აქტიური ჩართვისკენ მოუწოდეს. ამ დრომდე უწყებებს არ უწარმოებიათ აქტიური კამპანია ვაქცინის პოპულარიზაციისთვის და აცხადებენ, რომ ახლა აპირებენ "გააქტიურებას".

On.ge-ს კითხვაზე, რა გააკეთეს ანტივაქსერული მოწოდებების წინააღმდეგ, ჩატარდა თუ არა რაიმე კამპანია, თუ ეს მხოლოდ საჯარო გამოსვლები და ბრიფინგები იყო ამირან გამყრელიძე პასუხობს:

"ვაქცინაცია გახლავთ კაცობრიობის ყველაზე დიდი მონაპოვარი. საქართველო ბოლო 7 წლის განმავლობაში დანერგა 4 ახალი ვაქცინა და ეს არი მეხუთე, რომელიც ინერგება. ნებისმიერი ვაქცინის დანერგვის პერიოდში მიმდინარეობს სერიოზული საკომუნიკაციო კამპანია. თვითონ 1 წლის განმავლობაში ნებისმიერ ყველა გამოსვლაში საუბარია ბრიფინგებზე,ს ხვა გამოსვლებში, თუ რას ნიშნავს ვაქცინა, რას აკეთბს ვაქცინა, როგორ იცავს ის ადამიანის ჯანრმთელობას და ასე შემდეგ. ამიტომ, ეს კამპანია მუდმივად მიმდინარეობს. ახლა კიდევ უფრო მეტად გააქტიურდება ეს კამპანია.

სამედიცინო პერსონალმა საკმაოდ კარგად იცის ის სიკეთე, რაც მოაქვს ვაქცინაციას. დღეს უკვე აცრილია სამას მილიონზე მეტი ადამიანი [მსოფლიოში] და არცერთი ლეტალური შედეგი ვაქცინის შემდეგ არ არის გამოტანილი, მაშინ , როცა 120 მილიონი ადამიანი დაავადდა და სამწუხაროდ, 2,6 მილიონი ადამიანი გარდაიცვალა", — განაცხადა გამყრელიძემ.

კითხვაზე, აიცრებიან თუ არა საზოგადოების ნდობის ასამაღლებლად თავად გამყრელიძე და ტიკარაძე, NDCD-ის დირექტორი ამბობს, რომ ვინაიდან ის იყო ინფიცირებული, ვაქცინის მიღება მხოლოდ გამოჯანმრთელებიდან 120 დღის გასვლის შემდეგ შეუძლია.

"როგორც კი გავა, დაითვალეთ 29 დეკემბრის შემდეგ 120 დღე, ნებისმიერი ვაქცინა რაც იქნება იმ დროს საქართველოში, მობრძანდით და ავირცები", — განაცხადა მან.

მინისტრმა კი აღნიშნა, რომ თუ კამპანიისთვის საჭირო იქნება, აუცილებლად აიცრება, თუმცა ახლა სხვები უფრო მეტად საჭიროებენ ვაქცინას და არ ისარგებლებს თავისი სტატუსით.

"საჭიროების შემთხვევაში, მეც აუცილებლად ავირცები, თუმცა ვთვლი, რომ გაცილებით უფრო მეტი ადამიანი არის, ვინც საჭიროებს პირველად ვაქცინაციას. მე, ალბათ, შევეცდები, რომ არ ვისარგებლო ჩემი სტატუსით და ის ვაქცინა, რომელიც შეიძლება, რომ სხვისთვის გაცილებით უფრო მეტი ეფექტის მომტანი იყოს, არ ვისარგებლო ამ პრიორიტეტით. თუმცა, თუ ეს საჭირო გახდა კამპანიისთვის, რა თქმა უნდა მე უარს არ ვიტყვი ვაქცინაციაზე", — განაცხადა მან.