ვაქცინაციისთვის ქვეყანაში შერჩეულია 82 დაწესებულება, თუმცა პირველ ეტაპზე პროცესი 29 ცენტრში დაიწყება და კვირის განმავლობაში ახალი ამცრელი პუნქტები დაემატება. ამის შესახებ ბრიგინზე NCDC-ის დირექტორმა, ამირან გამყრელიძემ განაცხადა

"პირველ ეტაპზე, ორშაბათიდან აცრა დაიწყება 29 ცენტრში. ეს არის თბილისის და ყველა რეგიონალური ცენტრში გამოყოფილი შესაბამისი ამცრელი კაბინეტები, რომელსაც დიდი გამოცდილება აქვთ იმუნიზაციის პროცესში მონაწილეობის", — განაცხადა მან.

თბილისში 10 ამცრელი ცენტრი იქნება, რეგიონებში კი ასე გადანაწილდა:

  • ქუთაისში — 4;
  • ბათუში — 4;
  • რუსთავში — 2;
  • ზუგდიდში — 2
  • რეგიონალურ ცენტრებში — თითო.

გამყრელიძის განცხადებით, 17 მარტს ამას დაემატება 35-მდე დაწესებულება, 19-ში კიდევ 23 დაწესებულება. მისივე თქმით, 1 კვირის განმავლობაში ვაქცინაციის პროცესი გაიშლება ყველა მუნიციპალურ ცენტრში.

AstraZeneca-ს ვაქცინის 43 200 დოზა საქართველოში დღეს დილით ჩამოიტანეს. ვაქცინაციის პროცესის დაწყება 15 მარტიდანაა დაგეგმილი

ჯანდაცვის მინისტრმა, ეკატერინე ტიკარაძემ 11 მარტს განაცხადა, რომ საწყის ეტაპზე აიცრება 43 200 ადამიანი და რადგან ეს ვაქცინა 2 დოზით კეთდება, მეორე დოზას აცრილები გაიკეთებენ მაშინ, როცა დამატებითიც შემოვა. მისი თქმით, იციან დროის მონაკვეთი, როცა გარანტირებულად მიიღებენ მეორე დოზებს და აქვთ დასტური, რომ შემოტანა გარანტირებულად მოესწრება.

მანვე აღნიშნა, პირველ რიგში აიცრებიან ექიმები და შემდეგ რისკჯგუფები. მისივე თქმით, გადანაწილება თავდაპირველად დიდ ქალაქებში მოხდება.

თავდაპირველად ჯანდაცვის სამინისტროში აცხადებდნენ, რომ თებერვლის ბოლოს საქართველო 29 250 დოზა Pfizer-ის ვაქცინას მიიღებდა, რომელიც 14 500-მდე სამედიცინო პერსონალზე იქნებოდა გათვლილი. თუმცა, ვაქცინის შემოტანა დაგვიანდა.

5 მარტს ჯანდაცვის მინისტრის მოადგილემ, თამარ გაბუნიამ განაცხადა, რომ Pfizer-ის ვაქცინა ქვეყანაში, წინასწარი ინფორმაციით, 22 მარტის კვირაში გამოიგზავნება.

გარდა ამისა, 2 მარტს დაავადებათა კონტროლის ეროვნული ცენტრის დირექტორმა, ამირან გამყრელიძემ განაცხადა, რომ საქართველო Novavax-თანაც აწარმოებდა მოლაპარაკებებს.