საპარლამენტო უმრავლესობის ლიდერი და ქართული ოცნების პოლიტიკური საბჭს წევრი, შალვა პაპუაშვილი აცხადებს, რომ TV პირველის მიერ გავრცელებული ჩანაწერები პარტია "ლელოს ხელით გამოგორდა".

"ვნახეთ, რომ ლელოს ხელით გაკეთდა ჩანაწერის გამოგდება, ასე ვიტყოდი [...] ლელოს და TV პირველის ხელით. ჩემი აღქმა ეს იყო, რომ რაც მე დავაკვირდი, ყველაზე რადიკალური რეაქცია, რაც გამიკვირდა, ჰქონდათ ლელოს წარმომადგენლებს", — განაცხადა პაპუაშვილმა POSTV-ის ეთერში.

მისი თქმით, ლელოს წარმომადგენლების ლექსიკა მნიშვნელოვნად შეიცვალა ამ ჩანაწერების გამოქვეყნების შემდეგ.

"თუ აკვირდებოდით, ბოლო პერიოდში, ლელოს ჰქონდა უფრო ისეთი ფრაზეოლოგია, რომ უნდა იყოს ეროვნული თანხმობა და ა.შ. და უცებ რადიკალურ ლიანდაგზე გადაეწყვნენ. იმავე მომენტში, როდესაც აი ამ აუდიო ჩანაწერებზე წავიდა საუბარი", — განაცხადა პაპუაშვილმა.

მას შემდეგ, რაც ირაკლი ღარიბაშვილის, ბერა ივანიშვილისა და ანზორ ჩუბინიძის მონაწილეობით ფარული ჩანაწერი გავრცელდა, პარტია ლელომ განცხადება გაავრცელა, სადაც ნათქვამია, რომ მათთვის ღარიბაშვილთან და მისი ჩართულობით ნებისმიერ ფორმატში მონაწილეობა მიუღებელია. პარტიის ერთ-ერთმა ლიდერმა, საბა ბუაძემ განაცხადა, რომ ღარიბაშვილთან ერთად მოლაპარაკებებში მონაწილეობას აღარ მიიღებდნენ.

მართალია, ღარიბაშვილის ქართული ოცნების სხვა წარმომადგენლით ჩანაცვლების სურვილი სხვა ოპოზიციურმა პარტიებმაც გამოთქვეს, თუმცა, ერთობლივი კონსულტაციების შემდეგ განაცხადეს, რომ ამის გამო მოლაპარაკებებზე უარს არ იტყოდნენ. საბოლოოდ, ევროპული საბჭოს პრეზიდენტის, შარლ მიშელის პირად წარმომადგენელთან, კრისტოფერ დანიელსონთან შეხვედრაზე ქართული ოცნებიდან პარტიის თავმჯდომარე, ირაკლი კობახიძე და პოლიტიკური საბჭოს წევრები — არჩილ თალაკვაძე და კახა კუჭავა მივიდნენ.

ლელოს ერთ-ერთმა ლიდერმა, ანა ნაცვლიშვილმა TV პირველის მიერ გავრცელებული ჩანაწერების ფიგურანტი საჯარო მოხელეების, პრემიერმინისტრ ირაკლი ღარიბაშვილისა და სახელმწიფო დაცვის სპეციალური სამსახურის უფროსის, ანზორ ჩუბინიძის თანამდებობიდან გადადგომა მოითხოვა.

გარდა ამისა, ლელოს ლიდერებმა გენერალურ პროკურატურაში ოფიციალური განცხადება შეიტანეს და ჩანაწერში ასახულ შესაძლო დანაშაულებებზე გამოძების დაწყება მოითხოვეს.

TV პირველმა 6 მარტს გაავრცელა ჩანაწერები, სადაც, ირაკლი ღარიბაშვილი, ბერა ივანიშვილი და ანზორ ჩუბინიძე იმ ადამიანების დასჯას გეგმავენ და განიხილავენ, ვინც ბერა ივანიშვილს აგინებს. ჩანაწერში საუბარია უკვე მომხდარ ფაქტებზეც, რომელთა მოყოლის პროცესში სავარაუდოდ, ირაკლი ღარიბაშვილი და ბერა ივანიშვილი იციანიან. სავარაუდოდ, ქართული ოცნების დამფუძნებლის შვილი კმაყოფილებას გამოხატავს იმის გამო, რომ მისი გინებისთვის ადამიანები ისჯებიან.

ჩანაწერების გამოქვეყნებიდან სამი დღის შემდეგ, 9 მარტს, ბერა ივანიშვილმა ტელეკომპანია იმედს ინტერვიუ მისცა. მთელი ინტერვიუს განმავლობაში მას ერთხელაც არ უთქვამს, რომ ჩანაწერები ნამდვილი არ არის. მეტიც, აუდიტორიის წინაშე ხმამაღლა განაცხადა, რომ თუ ვინმე დედას შეაგინებს, პასუხს მოსთხოვს. დაადასტურა ბავშვების მშობლებთან მისვლაც, მაგრამ ამტკიცებს, რომ ეს ადამიანები კანონისა და მორალის დაცვით მოინახულეს.