ეკონომიკის მინისტრის, ნათია თურნავას განცხადებით, კვლევების გადამოწმებამდე ნამახვანჰესის კაშხლისა და წყალსაცავის მშენებლობა არ დაიწყება. ამის შესახებ მან მოქალაქეებთან შეხვედრის დროს განაცხადა და კომპანიასთან რამდენიმე შეთანხმებაზე ისაუბრა.

გარდა ამისა, დაინიშნება ქართველი დირექტორი, რომელიც ნამახვანჰესზე სამუშაოებს გაუძღვება. თურნავამ განაცხადა, რომ შეიქმნება დამოუკიდებელი საბჭო, რომელში შემავალი ექსპერტები პროექტს ზედამხედველობას გაუწევს.

როგორც მინისტრმა აღნიშნა, ნამახვანი ერთ-ერთი ყველაზე კარგად შესწავლილი პროექტია, რომელზეც არაერთი კვლევა ჩატარებულა. ნათია თურნავას თქმით, დამოუკიდებელ ექსპერტებს სახელმწიფო დაიქირავებს და არა კომპანია.

"იმისთვის, რომ ყველა საჭოჭმანო საკითხი მოიხსნას საბოლოოდ, რაც შეეხება პროექტის უსაფრთხოებას და კვლევების საიმედოობას, ჩვენ შევთანხმდით კომპანიასთან, რომ ისინი არ დაიწყებენ ჰესის ძირითადი ნაგებობების, კერძოდ კაშხლის და წყალსაცავის მშენებლობას მანამ, სანამ ჩვენ არ გავაკეთებთ რამდენიმე პრინციპული კვლევის გადამოწმებას/ვალიდაციას", — აღნიშნა მინისტრმა.

რაც შეეხება დანარჩენ ინფრასტრუქტურულ სამუშაოებს, კომპანია ამ მშენებლობებს გააგრძელებს.

გარდა ამისა, ნათია თურნავა ამბობს, რომ შეიქმნება რიონის ხეობის განვითარების ფონდი. ამ ფონდში კონტრიბუციას შეიტანს როგორც ინვესტორი, ასევე სახელმწიფო.

"მთლიანობაში ვფიქრობთ, რომ ხუთი მილიონი ლარის ოდენობის ფონდი იქნება, რომელიც მშენებლობის განმავლობაში იმოქმედებს და მხარს დაუჭერს და დააფინანსებს ხეობის მოსახლეობისთვის ყველა საჭირო პროექტს. მის მართვაში ჩაერთვებიან მოსახლეობის წარმომადგენლები, სათემო ორგანიზაციები და ეს ფონდი დაფარავს არა მარტო რამდენიმე სოფელს, რომელიც მოქცეულია პროექტის არეალში, არამედ ცაგერისა და წყალტუბოს მუნიციპალიტეტების ძირითად სოფლებს, რომლებიც ხეობაშია განთავსებული", — აღნიშნა თურნავამ.