იურისტის და TV პირველის ინტერესების დამცველის, გიორგი მშვენიერაძის თქმით, სასამართლოს განჩინება იყო მიზანმიმართული მესიჯი საზოგადოებაში, რომ მათ აინტერესებთ არა ჩანაწერი, არამედ ამ ჩანაწერის წყარო.

"მართლა არ მჯერა, რომ იმდენად უგუნურები არიან, რომ ვერ ხვდებიან, რა მოყვებოდა მსგავს საქციელს. მაგალითად, რა მოყვებოდა იმას, რომ შუამდგომლობით არ მოითხოვეს, მათ შორის, ჩანაწერის ამოღება ცალკე. ხო ძალიან მარტივია? ამდენად უგუნურები არ არიან. მათ მიზანმიმართულად უნდოდათ ყოფილიყო მესიჯი, გზავნილი საზოგადოებაში, რომ ჩვენ ჩანაწერი არ გვაინტერესებს, გვაინტერესებს საიდან მოხვდა ჩანაწერი ტელეკომპანიაში და ამის შესასწავლად ყველაფერს გავაკეთებთ, მათ შორის, გადავლახავთ წითელ ხაზებს, თუ ამის საჭიროება დადგა", — აცხადებს მშვენიერაძე TV პირველის ეთერში.

11 მარტს TV პირველმა მიიღო სასამართლოს განკარგულება, რომლითაც დაკმაყოფილდა პროკურატურის მოთხოვნა ტელეკომპანიიდან ბერა ივანიშვილისა და ირაკლი ღარიბაშვილის საუბრის ჩანაწერების ამოღების შესახებ. თუმცა განკარგულებაში წერია ისიც, რომ თუ TV პირველი არ მიაწოდებს ჩანაწერების შესახებ ინფორმაციას საგამოძიებო მოქმედებების ჩამტარებელ პირს ან ორგანოს, მათ უფლება აქვთ წინააღმდეგობის გაწევისას გამოიყენოს იძულების პროპორციული ზომა.

TV პირველმა 6 მარტს გაავრცელა ჩანაწერები, სადაც, ირაკლი ღარიბაშვილი, ბერა ივანიშვილი და ანზორ ჩუბინიძე, სავარაუდოდ, იმ ადამიანების დასჯას გეგმავენ და განიხილავენ, ვინც ბერა ივანიშვილს აგინებს. ჩანაწერში საუბარია უკვე მომხდარ ფაქტებზეც, რომელთა მოყოლის პროცესში ირაკლი ღარიბაშვილი და ბერა ივანიშვილი იციანიან. ქართული ოცნების დამფუძნებლის შვილი კმაყოფილებას გამოხატავს იმის გამო, რომ მისი გინებისთვის ადამიანები ისჯებიან.

პროკურატურამ აღნიშნულ საქმეზე გამოძიება კერძო საუბრის უკანონო მიყურადების, ჩაწერისა და გავრცელების მუხლით დაიწყო.

უწყება არაფერს ამბობს იმაზე, დაინტერესდა თუ არა სავარაუდო ძალადობის ფაქტებით, რაზეც ჩანაწერშია საუბარი.

პროკურატურის ინფორმაციით, საქმეზე მიმდინარე გამოძიების ფარგლებში, ჩატარდება ყველა საჭირო საგამოძიებო და საპროცესო მოქმედება ჩანაწერის მოპოვების და გავრცელების კანონიერების დასადგენად.

სამი დღის შემდეგ, 9 მარტს, ბერა ივანიშვილმა განაცხადა, რომ 2011 წელს მისი ფანების მშობლებმა ბულინგის შესახებ აცნობეს და დაცვის სამსახურმა "ყველა კანონის, მორალის დაცვით მოინახულა" ისინი. ბერა ივანიშვილმა, ასევე, განაცხადა, რომ თუ ვინმე დედას შეაგინებს, აუცილებლად მოსთხოვს პასუხს დღესაც.

გაიგეთ მეტი: