მოქალაქეების ერთ-ერთი ლიდერის, ლევან იოსელიანის თქმით, სამწუხაროა, რომ ხელისუფლება წინა ხელისუფლების მიერ დაშვებულ შეცდომებს იმეორებს. აღნიშნულით იოსელიანი TV პირველზე TV პირველზე სასამართლოს მიერ მიღებულ გადაწყვეტილებას ეხმაურება.

"პრობლემა არის ის, რომ ამ ქვეყანაში სასამართლოს არ აქვს ნდობა, ამიტომ მის მიერ გამოცემული დოკუმენტების მიმართაც არ არსებობს ნდობა. ერთ რამეს ვიტყვი, რომ ძალიან სამწუხაროა, რომ ხელისუფლება იმეორებს იმ შეცდომებს, რაც წინა ხელისუფლებამ დაუშვა და რის გამოც გადაიხადა შესაბამისად პოლიტიკური ფასი. სიტყვის გამოხატვის თავისუფლება არის ყველაზე მაღალი სტანდარტით დაცული ჩვენს ქვეყანაში და პირდაპირ წერია კანონში, რომ ის არის დაცული იმდაგვარი პრივილეგიით, რომ აკრძალულია მოსთხოვო წყაროს დასახელება. ეს პირდაპირ არის მითითებული სიტყვის გამოხატვის შესახებ კანონში, ამიტომ ნებისმიერი მცდელობა, რომ გამოძიება წავიდეს წყაროს მოპოვებისკენ, ეს არის უკანონო და არასწორი. მე ვფიქრობ, რომ უფრო სწორია, რომ გამოძიება დაინტერესდეს შინაარსით, ზოგადად, რაც არის ჩანაწერებში. შინაარსში არის პრობლემა და არა მის მოპოვებაში", — განაცხადა იოსელიანმა რუსთავი 2-ის ეთერში.

სასამართლოს განკარგულების მიხედვით, თუ TV პირველი არ მიაწოდებს ჩანაწერების შესახებ ინფორმაციას საგამოძიებო მოქმედებების ჩამტარებელ პირს ან ორგანოს, მათ უფლება აქვთ წინააღმდეგობის გაწევისას გამოიყენოს იძულების პროპორციული ზომა.

"საგამოძიებო მოქმედებების ჩამტარებელ პირს ან ორგანოს უფლება აქვს წინააღმდეგობის გაწევისას გამოიყენოს იძულების პროპორციული ზომა", — წერია განკარგულებაში.

კითხვით, მისცემენ თუ არა ჩანაწერებს პროკურატურას, On.ge ნოდარ მელაძეს დაუკავშირდა. მისი თქმით, ამისთვის პროკურატურამ შესაბამისი განჩინებით უნდა მიმართოს, ახლა კი "გაურკვეველ კონვერტს" და "ელექტრონულ მატარებელს" ითხოვს. მისივე თქმით, იურისტები უკვე ამზადებენ შესაბამის საპასუხო წერილს, რომელიც პროკურატურას გაეგზავნება.