ქართული ოცნების დეპუტატის, დავით მათიკაშვილის განცხადებით, TV პირველის მასალებზე სასამართლოს გადაწყვეტილებაში არანაირ შეჭრასა და შევარდნაზე საუბარი არ უნდა იყოს.

"ერთი ვინ ამბობს ტელევიზიაში შესვლასთან დაკავშირებით? კიდევ ერთხელ გეუბნებით, არ შეიძლება ყველაფერი იყოს სპეკულაციების და პროვოკაციების საგანი. საზოგადოებისთვის არის კარგად ცნობილი, რომ საგამოძიებო მოქმედებები ტარდება მხოლოდ კანონით გათვალისწინებული წესით და იქ არანაირ შეჭრაზე, შევარდნაზე, მით უმეტეს მცდარ და სიცრუით გაჯერებული ინფორმაციით საზოგადოების კვებაზე არ უნდა იყოს საუბარი", — განაცხადა მათიკაშვილმა.

სასამართლოს განკარგულების მიხედვით, თუ TV პირველი არ მიაწოდებს ჩანაწერების შესახებ ინფორმაციას საგამოძიებო მოქმედებების ჩამტარებელ პირს ან ორგანოს, მათ უფლება აქვთ წინააღმდეგობის გაწევისას გამოიყენოს იძულების პროპორციული ზომა.

"საგამოძიებო მოქმედებების ჩამტარებელ პირს ან ორგანოს უფლება აქვს წინააღმდეგობის გაწევისას გამოიყენოს იძულების პროპორციული ზომა", — წერია განკარგულებაში.

კითხვით, მისცემენ თუ არა ჩანაწერებს პროკურატურას, On.ge ნოდარ მელაძეს დაუკავშირდა. მისი თქმით, ამისთვის პროკურატურამ შესაბამისი განჩინებით უნდა მიმართოს, ახლა კი "გაურკვეველ კონვერტს" და "ელექტრონულ მატარებელს" ითხოვს. მისივე თქმით, იურისტები უკვე ამზადებენ შესაბამის საპასუხო წერილს, რომელიც პროკურატურას გაეგზავნება.