მოსწავლეების მიერ საპირფარეშოს დასუფთავების გამო, ჩხოროწყუში მერის გადადგომას მოითხოვენ. ამის შესახებ ნაციონალური მოძრაობის და ჩხოროწყუს საკრებულოს წევრმა, რამაზ გულიამ ჟურნალისტებთან ისაუბრა.

"ჩვენი მოთხოვნა არის, რომ სამარცხვინო მერმა დატოვოს ჩხოროწყუს მერის თანამდებობა, ხომ ხედავთ, საკრებულო რა დღეშია? აქ ამ ყველაფერს "აპრავებენ", აქ ამათ გული არ შესტკივათ იმისთვის, რომ ეს ბავშვები დაიჩაგრნენ. ამ ბავშვებს ეს გაჰყვებათ მთელი ცხოვრების მანძილზე", — უთხრა მან ჟურნალისტებს.

ჩხოროწყუს მერის მოადგილის, გოჩა ჩიქოვანის განცხადებით, მერია გმობს მომხდარს და მათთვის ეს "მიუღებელია".

"ჩხოროწყუს მუნიციპალიტეტის მერია გმობს აღნიშნულ ფაქტს, იმიტომ, რომ ეს იყო, პრაქტიკულად, მარაზმი. ეს არის მიუღებელი თიოთოეული ჩვენგანისთვის. ერთ-ერთი მოქალაქის მიერ მოხდა მოსწავლეების შემოყვანა და გარკვეული დასუფთავების აქციის წარმართვა [...] დღევანდელი დღე მათ, პრაქტიკულად პოლიტიკურ ასპარეზად აქციეს და ამ უაღრესად სამარცხვინო ფაქტს იყენებენ, მათ საკეთილდღეოდ", — განაცხადა მან.

მერიის შენობის მიმდებარედ შეკრებილები იყვნენ მოქალაქეებიც. მათ შენობაში შესვლა სცადეს, თუმცა პოლიციამ ამის საშუალება არ მისცა. აქციის მონაწილეებიც მერის გადადგომას მოითხოვდნენ.

რამდენიმე დღის წინ ჩხოროწყუს ერთ-ერთი საჯარო სკოლის მოსწავლეებს ადგილობრივი მერიის შენობაში გაწმენდითი სამუშაოები ჩაატარებინეს. როგორც სოციალურ ქსელში გავრცელებულ ვიდეოში ჩანს, ბავშვები საპირფარეშოს ასუფთავებენ. ჩხოროწყუს მერმა, დავით გოგუამ On.ge-ს აღნიშნული ფაქტი დაუდასტურა. მან გვითხრა, რომ ბავშვები ნამდვილად იყვნენ შენობაში და სხვადასხვა გაწმენდით სამუშაოს აწარმოებდნენ. გოგუას განცხადებით, "უმკაცრესად დაისჯება ყველა", ვინც შემხებლობაში იყო ამბავთან.

განათლების სამინისტროში აცხადებენ, რომ უწყების შიდა აუდიტის დეპარტამენტმა ფაქტის იდენტიფიცირებისთანავე დაიწყო მოკვლევა. მომხდარზე გამოძიება დაიწყო შინაგან საქმეთა სამინისტრომაც. შშს-ში ამბობენ, რომ გამოძიება სისხლის სამართლის კოდექსის 150-ე მუხლით დაიწყო, რაც იძულებას გულისხმობს