სამოქალაქო ავიაციის სააგენტოს ცნობით, ავიაკომპანიებმა Ukraine International Airlines (UIA) და SkyUp Airlines კიევი-თბილისი-კიევის მიმართულებით რეგულარული ოპერირება დღეიდან განაახლეს. სააგენტოს ინფორმაციით, ავიაკომპანია Ukraine International Airlines-მა პირველი რეისი კიევი-თბილისი-კიევის მიმართულებით უკვე შეასრულა.

ავიაკომპანია SkyUp Airlines კიევი-თბილისი-კიევის საჰაერო ხაზზე კვირაში 2 სიხშირით, ყოველ ხუთშაბათსა და კვირას იფრენს, ხოლო ავიაკომპანია Ukraine International Airlines — ასევე 2 სიხშირით, ყოველ ორშაბათსა და შაბათს.

"მგზავრთა გადაყვანა არსებული სასაზღვრო და სანიტარული რეგულაციების გათვალისწინებით მოხდება. საქართველოს ეკონომიკისა და მდგრადი განვითარების სამინისტროს სამოქალაქო ავიაციის სააგენტოს მიერ, ავიაკომპანიებს წარმოდგენილი განრიგით ოპერირების ნებართვა 29 იანვარს მიენიჭა", — აცხადებენ სამოქალაქო ავიაციის სააგენტოში.

თებერვლის ფრენის განრიგი ნახეთ ბმულზე: http://www.gcaa.ge/geo/tbilisiout.php

სააგენტოს ინფორმაციით, განრიგი განახლებადია (იცვლება ფრენის დამატების/გაუქმების/ფრენის თარიღის/დროის ცვლილების შემთხვევაში).

22 იანვარს ცნობილი გახდა, რომ პირველი თებერვლიდან რეგულარულ ფრენებზე შეზღუდვები უქმდება.