საქართველოს სახელმწიფო უსაფრთხოების სამსახურში აცხადებენ, რომ ანტიკორუფციული სააგენტოს თანამშრომლებმა დიდი ოდენობით ქრთამის აღებისა და უკანონო ქმედების ჩასადენად ქრთამის მიცემის ბრალდებით, ბორჯომის მერიის ინფრასტრუქტურის, არქიტექტურისა და ზედამხედველობის სამსახურის ყოფილი უფროსი და ერთი პირი დააკავეს. უწყების ცნობით, გამოძიებით დგინდება, რომ 2020 წლის იანვარში, ბორჯომში მცხოვრები პირი მერიის ინფრასტრუქტურის, არქიტექტურისა და ზედამხედველობის სამსახურის უფროსს დაუკავშირდა და ბორჯომის მუნიციპალიტეტის სოფელ ჭობისხევში მდებარე, საკომლო ჩანაწერით, მის მფლობელობაში არსებული მიწის ნაკვეთის რეგისტრაციაში დახმარება სთხოვა.

"იმის გათვალისწინებით, რომ მიწის მოცემული ადგილმდებარეობა აღნიშნულ პირს არ აკმაყოფილებდა, შესთავაზა, მიწის ნაკვეთის რეგისტრაცია მოეხდინათ ტურისტული მიზნებისათვის პერსპექტიულ ადგილას, რის სანაცვლოდაც, ქრთამის სახით შესთავაზა დასარეგისტრირებელი მიწის ნაკვეთის ნაწილის ან შესაბამისი ღირებულების ფულადი თანხის გადაცემა. აღნიშნულ შეთავაზებაზე ბორჯომის მერიის მაღალჩინოსანი დათანხმდა და დაჰპირდა, რომ სამსახურებრივი უფლებამოსილებისა და ავტორიტეტის გამოყენებით უზრუნველყოფდა სოფელ ჭობისხევის რწმუნებულს მიწის ნაკვეთის იდენტურობის ყალბი ცნობა გაეცა, რის საფუძველზეც 46 737 ლარის ღირებულების 10 000 მ2 ფართობის სახელმწიფოს კუთვნილი მიწის ნაკვეთის უკანონოდ რეგისტრაცია მოხდებოდა", — აცხადებენ სუს-ში.

მათივე ცნობით, საქმეზე გატარებული ოპერატიული და საგამოძიებო მოქმედებების შედეგად დანაშაულებრივი ჯგუფის წევრებმა მიწის ნაკვეთის რეგისტრაცია ვერ მოახერხეს და მართლსაწინააღმდეგო ქმედების განხორციელებაში ამხილეს. სუს-ის ინფორმაციით, გამოძიება სისხლის სამართლის კოდექსის 338-ე მუხლის მეორე ნაწილის "ბ" ქვეპუნქტით და 339-ე მუხლის მეორე ნაწილით მიმდინარეობს. გამოძიებას სუს-ის ანტიკორუფციული სააგენტო აწარმოებს.