საგანგებო სიტუაციების მართვის სამსახურის ინფორმაციით, ამ დროისთვის აქტიურია ცეცხლის 7 კერა, მათგან 3 ლოკალიზებულია. მათი განცხადებით, ხანძარი დარჩენილია სამეგრელოში, რაჭა-ლეჩხუმსა და შიდა ქართლში.

უწყების ცნობით:

  • შვიდი კერიდან 4 სამეგრელოშია, მათ შორის, ერთი ლოკალიზებულია და მიმდინარეობს სალიკვიდაციო სამუშაოები. სამზე გრძელდება სალოკალიზაციო სამუშაოები;
  • 2 კერაა წალენჯიხაში, სოფელ სქურში, ერთი სოფელ ფახულანში და ერთიც მარტვილში, სოფელ დობარაზენში;
  • 2 კერაა დარჩენილი რაჭა-ლეჩხუმ ქვემო სვანეთში, მათ შორის, ერთი ლოკალიზებული. ონში რჩება სასაზღვრო პოლიციის ვერტმფრენი და საჭიროების შემთხვევაში ჩაერთვება ქრობის სამუშაოებში;
  • ონში, სოფელ ონჭევის და წოლას მიმდებარედ ხანძარი ლოკალიზებულია, მიმდინარეობს სალიკვიდაციო სამუშაოები, ხოლო ამბროლაურში, სოფელი აბარში, გრძელდება სალოკალიზაციო სამუშაოები;
  • ხანძარი ლოკალიზებულია, ასევე, შიდა ქართლში, კასპში, რკონის ხეობაში და მიმდინარეობს სალიკვიდაციო სამუშაოები.

სოციალურ ქსელებში გუშინ გავრცელებულ ფოტოებში ჩანდა, რომ გაგრაში ცეცხლი საცხოვრებელ სახლებს უახლოვდებოდა. დღეს, 7 იანვარს, ოკუპირებული აფხაზეთის საგანგებო სიტუაციების დე ფაქტო უწყებაში აცხადებენ, რომ ხანძრის ლიკვიდაცია მოახდინეს. მათივე ცნობით, გაგრის რეგიონში, დაახლოებით, ექვსი ჰექტარი ფართობი დაიწვა. ხანძარი საცხოვრებელ კორპუსებსაც მიუახლოვდა.

საგანგებო სიტუაციების მართვის სამსახური მოსახლეობას მოუწოდებს, თავი შეიკავონ მინდვრებში და სახნავ მიწებზე ბალახის დაწვისგან. დასავლეთ საქართველოში ძლიერი ქარია და მშრალი ამინდი, რაც ხელს უშლის მეხანძრე-მაშველებს ხანძრების სალიკვიდაციო სამუშაოებში.