22 ნოემბერს ბათუმის რკინიგზის სადგურიდან თბილისის მიმართულებით მატარებელი 20 წუთით ადრე გავიდა. მგზავრთა ნაწილმა თბილისში წასვლა ვერ მოახერხა და არც ინფორმაციას ფლობდა, რატომ გავიდა მატარებელი დანიშნულ დროზე ადრე.

როგორც მათ ცხელ ხაზსა და სალაროში განუცხადეს, განრიგი შეიცვალა და მატარებელი 15:25-ის ნაცვლად 15:05-ზე საათზე გავიდა.

On.ge დაუკავშირდა საქართველოს რკინიგზის პრესცენტრს და ეცადა, გაერკვია, რატომ არ მიაწოდეს მგზავრებს ინფორმაცია შეცვლილი განრიგის შესახებ. კომპანიაში ამბობენ, რომ ვინც ბილეთი 20 ნოემბერის შემდეგ იყიდა, იმათ ბილეთზე უკვე შეცვლილი დრო ეწერა, ასევე, მგზავრები გააფრთხილეს მოლარეებმა. ხოლო იმ ადამიანებს, ვინც ბილეთი 20 ნოემბრამდე იყიდა, კომპენსაციას ჰპირდებიან.

კითხვას, გააფრთხილეს თუ არა მგზავრები დროის შეცვლის შესახებ, საქართველოს რკინიგზაში პასუხობენ, რომ მეილებზე და მობილურის ნომრებზე ინფორმაციას ვერ დაგზავნიდნენ, რადგან ბაზასთან წვდომა არ აქვთ. მათივე თქმით, შეცვლილი განრიგი გამოქვეყნდა კომპანიის ვებგვერდზე, ასევე, შესაბამისი პოსტი ჰქონდათ Facebook-ზე. On.ge-მ მათი გვერდის გადამოწმებისას აღმოაჩინა, რომ პოსტი 8 ნოემბერს გამოქვეყნებულა, რაც იმას ნიშნავს, რომ ამის შემდეგ ნაყიდ ბილეთებზე არასწორი დრო იყო დატანილი.

გარდა იმისა, რომ მოქალაქეებს შეეცვალათ მარშრუტი და გეგმები, სხვა ტრანსპორტის პოვნის შემთხვევაში, იყო საფრთხე, რომ 22:00 საათამდე თბილისში ვერ ჩამოსულიყვნენ, ამ დროის შემდეგ კი ქალაქში გადაადგილება აკრძალულია.

ერთ-ერთმა მგზავრმა, რომელმაც მგზავრობა ვერ შეძლო, განაცხადა, რომ ბილეთი 18 ნოემბერს შეიძინა და თუ პოსტი 8 ნოემბერს იყო გამოქვეყნებული, შესაბამისად, ყიდვისას განახლებული დრო უნდა ეჩვენებინა.

"დავრეკე ცხელ ხაზზე და თქვენი საჩივარი დაფიქსირებულია, ხვალ გადმოგირეკავენო. ტყუილად ჩაინიშნეს ის საჩივარი, რა უნდა გვითხრან? სამარშრუტო ტაქსით წავედი, არ ვიცი 22:00 საათამდე თუ ჩავალ, ან თუ ჩავალ, იქნებ, სახლამდე ვერ მივასწრო. დავრეკე და მოვითხოვე, საშვი დაეშვათ, მაგრამ მაგასაც არ აქვს აზრი", ― ამბობს მგზავრი.

მგზავრთა ნაწილმა ბილეთები დილის რეისზე გადაცვალა, ნაწილმა კი წასვლა ვერ მოახერხა.