ქართული ოცნების აღმასრულებელი მდივნის, ირაკლი კობახიძის განცხადებით, ცესკოსთან აქციის დროს წყლის ჭავლი რომ არ გამოეყენებინათ, ბევრად მეტი ადამიანი დაშავდებოდა. მისი მტკიცებით, წყლის ჭავლმა შესაძლებელი გახადა, რომ მინიმალური ზიანი მიადგათ როგორც პოლიციას, ისე დემონსტრანტებს.

"იყო უმძიმესი შტურმი, სხვადასხვა ფორმით განხორციელებული, მათ შორის ქვების დაშინებით, ღობის შენგრევით და ა.შ. შტურმი იყო განხორციელებული ცესკოს შენობაზე და უპირისპირდებოდნენ ძალისმიერად პოლიციელებს. ასეთ დროს, ბუნებრივია, თავდაცვითი რეაგირების განხორციელება სამართალდამცავი ორგანოების მხრიდან არის ნორმალური. წყლის ჭავლი იყო მინიმალური ზომა, რომელიც იქნა გამოყენებული სამართალდამცავი ორგანოების მხრიდან", — განაცხადა კობახიძემ.

იგი ამბობს, რომ პროპორციულობის პრინციპი დაცული იყო. გარდა ამისა, კობახიძე აღნიშნავს, რომ ცესკოსთან 200 ადამიანი იყო შეკრებილი, თუმცა ღობის შესანგრევად და შტურმისთვის ეს საკმარისი იყო:

"მთლიანად შეკრებამ მიიღო კანონსაწინააღმდეგო სახე და აქედან გამომდინარე წყლის ჭავლის გამოყენება იყო ყველაზე რბილი ზომა, რომელსაც შეეძლო ვითარების განმუხტვა. წყლის ჭავლის გამოყენება რომ არ მომხდარიყო, დამერწმუნეთ, ბევრად მეტი ადამიანი დაშავდებოდა როგორც ერთ, ისე მეორე მხარეს".

სპეცრაზმმა აქცია გაფრთხილების გარეშე დაშალა — რა მოხდა ცესკოსთან

8 ნოემბერს ოპოზიციამ პარლამენტთან საპროტესტო აქცია გამართა, რომელზეც მთავრობას სამი მოთხოვნა წამოუყენა და დრო რვა საათამდე მისცა. ისინი ხელახალ არჩევნებს, ცესკოს თავმჯდომარის გადადგომას და პოლიტპატიმრების გათავისუფლებას ითხოვდნენ. ულტიმატუმის ვადის ამოწურვის შემდეგ ნიკა მელიამ განაცხადა, რომ მათთან კონტაქტზე მყოფმა ირაკლი კობახიძემ და არჩილ თალაკვაძემ ხვალ შეხვედრა შესთავაზეს, რასაც არ დათანხმდებოდნენ. ეს კობახიძემ უარყო და ამტკიცებდა, რომ შეხვედრა ოპოზიციამ მათ შესთავაზა და ამას მხოლოდ პარტნიორების სურვილის შემთხვევაში დათანხმდებოდნენ.

რვა საათის შემდეგ ოპოზიციამ განაცხადა, რომ ცესკოსთან გადაინაცვლებდნენ და არავის მისცემდნენ შიგნით შესვლის ან იქედან გამოსვლის უფლებას. სანამ ოპოზიცია მსვლელობით მივიდოდა, ცესკოსთან რამდენიმე ადამიანი შეიკრიბა. ადგილზე მობილიზებული იყო პოლიცია, რომელთა რაოდენობამ იზრდებოდა. ცესკოსთან მოხდა რამდენიმე დაპირისპირებაც, თუმცა მალევე აღმოიფხვრა.

ამის შემდეგ კი ადგილზე სპეცრაზმი გამოჩნდა, რომელმაც გაფრთხილების გარეშე დაიწყო წყლის ჭავლის გამოყენება აქციის მონაწილეების წინააღდეგ. აქციაზე გაუშვეს სავარაუდოდ ცრემლსადენი გაზიც, თუმცა შსს ამას უარყოფს. რაც შეეხება წყლის ჭავლს, ამას პროპორციულ ძალად მიიჩნევს. ამ ეტაპზე არსებული ინფორმაციით, აქციის დაშლისას 30-მდე ადამიანი დაშავდა, მათგან 5 კლინიკებში გადაიყვანეს.

უფლებადამცველები, ყოფილი და მოქმედი სახალხო დამცველები კი აცხადებენ, რომ აქციის დაშლა ამ მეთოდით არაკანონიერი იყო და არღვევდა გამოხატვის თავისუფლებას. მათივე თქმით, ეს იყო სასტიკი და არაპროპორციული ძალა.

• დაშლისა და ჭარბი სპეციალური საშუალებების გამოყენების კანონიერი საფუძვლები არ არსებობდა — EMC
• კონსტიტუციური უფლების უხეშ დარღვევად შეიძლება შეფასდეს — TI ცესკოსთან პოლიციის ქმედებაზე
• მოვუწოდებ პოლიციას, შეწყვიტოს და არ გამოიყენოს არაპროპორციული ძალა აქციის მონაწილეების მიმართ! — ლომჯარია

გაიგეთ მეტი მომხდარის პოლიტიკურ შეფასებებზე:

• შეეშვან ხალხის ხოცვას, დაშლას არ ვაპირებთ, სანამ ჩვენი მოთხოვნა არ შესრულდება — ხოშტარია
• მოვუწოდებ, არ გაცდნენ პროტესტის მშვიდობიან ფორმას, სახელმწიფო ყველა კანონდარღვევას უპასუხებს პროპორციულად — მდინარაძე
• ასეთ დროს მსოფლიოს არცერთ განვითარებულ ქვეყანაში გაფრთხილება ვერც ესწრება და არც ხდება — მდინარაძე
• ეს არის უტიფარი რეჟიმის პანიკა, ასე იქცევა ყველა ავტორიტარული რეჟიმი — ბოკერია
• ის, რაც ცესკოსთან ხდება, არის პანიკის ნიშანი ხელისუფლების მხრიდან, ეს არის ლუკაშენკოს ხელისუფლება — ბაქრაძე
• გინდა წყლის ჭავლი გვასხან, გინდა გვირტყან, საქართველოს არ დავთმობთ — ალეკო ელისაშვილი