ადვოკატი გიორგი კონდახიშვილის თქმით, ნაციონალური მოძრაობის ლიდერი, ნიკა მელია სასამართლოდან გაძევებულია და მას პროცესზე დასწრების უფლება არ აქვს. თბილისის საქალაქო სასამართლოში ნიკა მელიასთვის აღკვეთის ღონისძიების გამკაცრების საკითხი უნდა განიხილონ.

"მას ჰკითხეთ რატომ არ მოვიდა ის პროცესზე. მე ვარ მისი ადვოკატი, კანონიერი წარმომადგენელი და სრულიად საკმარისია პროცესისთვის, რომ ადვოკატით იყოს წარმოდგენილი", — განაცხადა ადვოკატმა.

პროკურატურა ნიკა მელიასთვის აღკვეთის ღონისძიების გამკაცრებას ითხოვს. მათი განცხადებით, მელიამ სამაჯურის მოხსნით აღკვეთის ღონისძიებები დაარღვია და უფრო მკაცრი ღონისძიებით სასამართლოს სწორედ ამიტომ მიმართეს.

"პროკურატურა ნიკა მელიასთვის აღკვეთის ღონისძიების სახით გირაოს 100 000 ლარის ოდენობით შეფარდებას და სახელმწიფო საზღვრის გადაკვეთის შეზღუდვის დაწესებას ითხოვს", — ამბობენ უწყებაში.

აღსანიშნავია, რომ ნაციონალური მოძრაობა ნიკა მელიას პატიმრობის მოთხოვნაზე საუბრობდა. ამავეს ამბობს On.ge-სთან მელიას ადვოკატი, გიორგი კონდახიშვილი. მისი ინფორმაციით, სასამართლოდან შეატყობინეს, რომ პროკურატურამ აღკვეთის ღონისძიების გამკაცრება მოითხოვა. როგორც ადვოკატი განმარტავს, მელიას გირაო აქამდეც ჰქონდა შეფარდებული და კანონის მიხედვით, გამკაცრება მხოლოდ პატიმრობის მოთხოვნაა.

ამ თემაზე კომენტარი უკვე გააკეთა ნიკა მელიამ. იგი ამბობს, რომ სამაჯურს არ გაიკეთებს.

1 ნოემბერს ნაციონალური მოძრაობის ლიდერმა, ნიკა მელიამ საპროტესტო აქციაზე ელქტროსამაჯური მოიხსნა. როგორც ის ამბობს, სამაჯურის ტარებას აღარ აპირებს.

"ეს არის უსამართლობის სიმბოლო. ეს არის ძალადობრივი სამაჯური, რომელსაც მე აღარ შევიბამ. გამორიცხულია. ზუსტად ვიცი, ვიჯდები მე ციხეში თუ ვიქნები თქვენთან ერთად იმ ბრძოლაში უახლოეს დღეებში, ერი გაიმარჯვებს", — განაცხადა ნიკა მელიამ.