შესწორება: სტატიის თავდაპირველი სათაური იყო "პროკურატურა სამაჯურის მოხსნის გამო ნიკა მელიას პატიმრობას ითხოვს". ამას ამბობდა როგორც მელიას ადვოკატი, ასევე, ნაციონალური მოძრაობის პრესსამსახური. მოგვიანებით პროკურატურამ დააზუსტა, რომ გირაოს და საზღვრის კვეთის შეზღუდვას ითხოვს.

პროკურატურა ნიკა მელიასთვის აღკვეთის ღონისძიების გამკაცრებას ითხოვს. მათი განცხადებით, მელიამ სამაჯურის მოხსნით აღკვეთის ღონისძიებები დაარღვია და უფრო მკაცრი ღონისძიებით სასამართლოს სწორედ ამიტომ მიმართეს.

"პროკურატურა ნიკა მელიასთვის აღკვეთის ღონისძიების სახით გირაოს 100 000 ლარის ოდენობით შეფარდებას და სახელმწიფო საზღვრის გადაკვეთის შეზღუდვის დაწესებას ითხოვს", — ამბობენ უწყებაში.

აღსანიშნავია, რომ ნაციონალური მოძრაობა ნიკა მელიას პატიმრობის მოთხოვნაზე საუბრობდა. ამავეს ამბობს On.ge-სთან მელიას ადვოკატი, გიორგი კონდახიშვილი. მისი ინფორმაციით, სასამართლოდან შეატყობინეს, რომ პროკურატურამ აღკვეთის ღონისძიების გამკაცრება მოითხოვა. როგორც ადვოკატი განმარტავს, მელიას გირაო აქამდეც ჰქონდა შეფარდებული და კანონის მიხედვით, გამკაცრება მხოლოდ პატიმრობის მოთხოვნაა.

ამ თემაზე კომენტარი უკვე გააკეთა ნიკა მელიამ. იგი ამბობს, რომ სამაჯურს არ გაიკეთებს.

"მე მეგობრებთან ერთად მზად ვარ ბოლომდე ბრძოლისთვის და ეს ბრძოლა იქნება ხალხის გამარჯვებით დამთავრებული. ამ სამაჯურს მე ხელზე არ გავიკეთებ გამორიცხულია, თუ აქვს იმის იმედი, რომ ამ სამაჯურს ხელზე გავიკეთებ ძალიან სცდება ივანიშვილი", — განაცხადა მელიამ.

აღკვეთის ღონისძიების შეცვლის შესახებ პროცესი დღეს 5 საათზე თბილისის საქალაქო სასამართლოში გაიმართება.

1 ნოემბერს ნაციონალური მოძრაობის ლიდერმა, ნიკა მელიამ საპროტესტო აქციაზე ელქტროსამაჯური მოიხსნა. როგორც ის ამბობს, სამაჯურის ტარებას აღარ აპირებს.

"ეს არის უსამართლობის სიმბოლო. ეს არის ძალადობრივი სამაჯური, რომელსაც მე აღარ შევიბამ. გამორიცხულია. ზუსტად ვიცი, ვიჯდები მე ციხეში თუ ვიქნები თქვენთან ერთად იმ ბრძოლაში უახლოეს დღეებში, ერი გაიმარჯვებს", — განაცხადა ნიკა მელიამ.