Yahoo-მ ოთხშაბათს განაცხადა, რომ მათ საიტზე მორიგი მასშტაბური ონლაინ შეტევა გამოააშკარავეს. კომპანიის ინფორმაციით, გატეხილია მილიარდზე მეტი მომხმარებლის ანგარიში 2013 წლის აგვისტოდან.

ეს ყველაზე დიდი გარღვევაა ინტერნეტის უსაფრთხოების ისტორიაში. ინფორმაციას როიტერი ავრცელებს.

კიბერდანაშაულის დროს, ჰაკერებმა მოიპარეს სახელები, იმეილის მისამართები, ტელეფონის ნომრები, დაბადების თარიღები, პაროლები, უსაფრთხოების კითხვები და პასუხები. როგორც Yahoo ამბობს, არ მოუპარავთ საკრედიტო ბარათის მონაცემები.

Yahoo-მ სექტემბერშიც განაცხადა გატეხილი ანგარიშების შესახებ. კომპანიის თქმით, სახელმწიფოს მიერ დაფინანსებულმა ჰაკერებმა, დაახლოებით 500 მილიონი მომხმარებლის ინფორმაცია მოიპარეს.

Yahoo-ს შესყიდვა ამ ზაფხულს Verizon-მა დააანონსა. "ინციდენტი მოლაპარაკებებზე ცუდად არ იმოქმედებს" - უთხრა როიტერს იაჰუს პრესსამსახურმა.

Yahoo მომხმარებლებს პაროლის შეცვლას ურჩევს.

აქამდე ყველაზე მასშტაბური კიბერდანაშაული ასევე Yahoo-ს 500 მილიონი მომხმარებლის ანგარიშის გატეხვა იყო:

  • Yahoo - 500 მლნ ანგარიში;
  • MySpace - 359 მლნ ანგარიში;
  • LinkedIn - 164 მლნ ანგარიში;
  • Adobe - 152 მლნ ანგარიში;
  • Badoo - 112 მლნ ანგარიში;
  • VK - 93 მლნ ანგარიში;
  • Dropbox - 68 მლნ ანგარიში;
  • tumblr - 65 მლნ ანგარიში;
  • iMesh - 49 მლნ ანგარიში;
  • Fling - 40 მლნ ანგარიში;
  • Last.fm - 37 მლნ ანგარიში