დაჯგუფება ისლამური სახელმწიფოს თავდასხმის შედეგად 16 ადამიანი გარდაიცვალა, 25 კი დაშავდა. შემთხვევა გუშინ, 13 მაისს, გვიან ღამით ბაღდადში მოხდა. ამის შესახებ ინფორმაციას Reuters ავრცელებს.

ISIS-ის სამი წარმომადგენელი კაფეში მყოფ ახალგაზრდებს დაესხა თავს, რომელთა შორის ესპანეთის საფეხბურთო კლუბ მადრიდის რეალის ფანებიც იმყოფებოდნენ. ცეცხლის გახსნის შემდეგ თავდამსხმელები მიიმალნენ, მოგვიანებით კი ბაზრის მიმდებარე ტერიტორიაზეც მოხდა აფეთქება.

ორივე შემთხვევაზე პასუხისმგებლობა ისლამურმა სახელმწიფომ აიღო.

ეს არ არის პირველი შემთხვევა, როცა ფეხბურთის გულშემატკივრები ერაყში ტერორისტების სამიზნე გახდნენ. ტერორისტების მოსაზრებით, ფეხბურთის თამაში ცოდვაა.

მადრიდის რეალმა მწუხარება გამოთქვა მომხდარის გამო და მიუსამძიმრა დაღუპულთა ახლობლებს.