საქართველოს ფინანსთა სამინისტროს საგამოძიებო სამსახურმა, მარკირებას დაქვემდებარებული აქციზური პროდუქციის აქციზური მარკის გარეშე, დიდი ოდენობით, ჯგუფურად რეალიზაციის ბრალდებით, ორი პირი სისხლის სამართლის პასუხისგებაში მისცა.

უწყება განმარტავს, რომ ბრალდებულებმა, თბილისში, სხვადასხვა სავაჭრო ობიექტებში უაქციზო, სომხური წარმოების თამბაქოს ნაწარმი, სიგარეტი MASTER უკანონოდ გაყიდეს. საგამოძიებო სამსახურის მტკიცებით, ჩხრეკის შედეგად, ბრალდებულებისგან დიდი ოდენობით უაქციზო თამბაქოს ნაწარმი ამოიღეს.

საქმეზე გამოძიება მიმდინარეობს საქართველოს სისხლის სამართლის კოდექსის მე-200 მუხლის პირველი ნაწილით, რაც სასჯელის სახით ითვალისწინებს თავისუფლების აღკვეთას 2-დან 4 წლამდე ვადით.