მას შემდეგ, რაც თბილისში ტაქსების რუსული კომპანია, იანდექს ტაქსი დაბალი ფასებით შემოვიდა, სხვა კომპანიები ცდილობენ, მომხმარებლები სხვადასხვა აქციით დააინტერესონ.

მაგალითად, ტაქსიფაიმ გადაწყვიტა, რომ მგზავრობიდან 5 თეთრი გადარიცხოს საქართველოს ტერიტორიული მთლიანობისთვის ბრძოლაში დაღუპულ ჯარისკაცთა ოჯახების დახმარების ფონდში. შესაბამისი განცხადება კომპანიამ გაავრცელა:

"ჩვენ გვინდა გავაკეთოთ კიდევ უფრო მეტი, ვიდრე ჩვენი მისიაა და წამოვიწყოთ საქველმოქმედო კამპანია, საიდანაც შემოსული თანხები მოხმარდება საქართველოს ერთიანობისთვის დაღუპული ჯარისკაცების ოჯახებს. 1 დეკემბრიდან თქვენ მიერ შესრულებული თითოეული მგზავრობიდან, ჩვენ გადავრიცხავთ 5 თეთრს საქველმოქმედო ფონდში. ჩვენი მიზანია წვლილი შევიტანოთ მათ დახმარებაში, ვისაც ეს ძალიან სჭირდება.

ჩვენ ასევე მოვუწოდებთ ჩვენს პარტნიორ მძღოლებს მონაწილეობა მიიღონ კამპანიაში სურვილის შესაბამისად და ასევე დაამატონ 5 თეთრი შესრულებული შეკვეთიდან. საქველმოქმედო აქციაში მონაწილე მძღოლებს ამოიცნობთ აპლიკაციაში სურათზე დატანილი გულის ნიშანის მეშვეობით. ასე რომ, თუ გამოძახებისას ავტომობილზე შენიშნეთ გული, დაუჭირეთ მხარი საქველმოქმედო აქციაში მონაწილე მძღოლს, გაუზიარეთ თქვენი თბილი და პოზიტიური ემოცია".