დღეს, მინეაპოლისში აქციების დროს CNN-ის გადამღები ჯგუფი პოლიციამ მაშინ დააპატიმრა, როდესაც ჟურნალისტი ომარ ხიმენეზი ტელევიზიის პირდაპირ ეთერში გადასცემდა ინფორმაციას. შტატის სამართალდამცავებმა ჟურნალისტი, პროდიუსერი და მისი ოპერატორი დააკავეს და ერთ საათში გაათავისუფლეს.

CNN-ის მიერ გავრცელებულ ვიდეოში ჩანს, რომ ჟურნალისტი პოლიციას პრესის ნიშანს უჩვენებს და ეუბნება, რომ გადამღებ ჯგუფს მათ მიერ მითითებულ სხვა ადგილზე გადაიყვანს, თუმცა მას მაინც აპატიმრებენ.

იმის მიუხედავად, რომ ჩანაწერი პირდაპირ ეთერში გავიდა, პოლიციამ დაკავების მიზეზად გადამღები ჯგუფის დაუმორჩილებლობა დაასახელა. მოგვიანებით, მინესოტას გუბერნატორმა CNN-ის პრეზიდენტს, ჯეფ ზაკერს დაურეკა და მომხდარის გამო ბოდიში მოიხადა.

გათავისუფლების შემდეგ, ხიმენეზი პირდაპირ ეთერში დაბრუნდა.

მინეაპოლისის ქუჩებში პროტესტი მესამე დღეა არ წყდება. არეულობის დროს არაერთი მაღაზია და მანქანა დაზიანდა. პროტესტის მონაწილეებმა ერთ-ერთ სავაჭრო ცენტრში გააჩინეს ხანძარი და პოლიციიის განყოფილება გადაწვეს. მინესოტას შტატის გუბერნატორმა ქალაქსა და მის შემოგარენში ეროვნული გვარდიის 500 წევრი გაგზავნა და "მშვიდობიან დროს საგანგებო სიტუაცია" გამოაცხადა.

ფოტო: Julio Cortez / AP

მინეაპოლისის მოქალაქეები დაკავებისას აფროამერიკელი კაცის, ჯორჯ ფლოიდის მკვლელობას აპროტესტებენ, რომელიც მას შემდეგ გარდაიცვალა, რაც თეთრკანიანმა პოლიციელმა ის ასფალტზე დააწვინა და კისერზე მუხლი დააჭირა.

ფლოიდის დაკავების მიზეზი სავარაუდო ყალბი 10-დოლარიანი იყო. გამვლელის მიერ გადაღებულ ვიდეოში, რომელიც სოციალურ ქსელში მალევე გავრცელდა, ჩანს, რომ დაკავებული კისრიდან ფეხის აღებას ითხოვს, რადგან ვერ სუნთქავს: "ვერ ვსუნთქავ", "არ მომკლათ" — ამ სიტყვებს იძახდა ფლოიდი სიცოცხლის ბოლო წუთებში.

ამავე თემაზე: