უკრაინის საგარეო საქმეთა მინისტრის, დიმიტრი კულებას განცხადებით, მიხეილ სააკაშვილი უკრაინის მოქალაქეა და ვერც ერთი სახელმწიფო ვერ მიუთითებს, თუ სად შეიძლება მისი დანიშვნა და სად არა. როგორც გამოცემა Unian წერს, აღნიშნული განცხადება ინტერვიუს დროს მინისტრმა მანამ გააკეთა, სანამ საქართველო უკრაინიდან კონსულტაციებისთვის ელჩს გაიწვევდა.

დიმიტრი კულებას თქმით, კიევი შეეცდება საქართველოსთან სტრატეგიულ ურთიერთობები შეინარჩუნოს იმ შემთხვევაშიც, თუ ეს უკანასკნელი უკრაინის მიმართ მკვეთრ ნაბიჯებს გადადგამს:

"ჩემი მხრიდან ყველა ღონეს ვიხმარ, რომ საქართველოსთან ჩვენი ურთიერთობები ნამდვილად მეგობრული და სტრატებიული დარჩეს. თუ ჩვენი ქართველი პარტნიორების მხრიდან რაიმე ხისტ ნაბიჯებს ექნება ადგილი, რა გაეწყობა, გადავიტანთ, და შემდეგ დაკარგულის აღდგენას დავიწყებთ".

გარდა ამისა, დიმიტრი კულებამ აღნიშნა, რომ ის საქართველოს საგარეო საქმეთა მინისტრს, დავით ზალკალიანსაც ესაუბრა.

"ეს იყო ძალიან მშვიდი, გაწონასწორებული საუბარი, მა თავისი მთავრობის პოზიცია გამაცნო... ჩვენ კი ძალიან მარტივი თეზისებიდან ამოვდივართ. პირველი — საქართველოსა და უკრაინის ურთიერთობა იმდენად განსაკუთრებულია, რომ არ შეიძლება ერთი ადამიანის ბედის მძევალი გახდეს. მეორე — ჩვენ გვესმის საქართველოს შიდაპოლიტიკური კონტექსტი და მასში არ ვერევით, მაგრამ ჩვენთვის ბატონი სააკაშვილი უკრაინის მოქალაქეა. და მსოფლიოს ვერც ერთი სახელმწიფო ვერ მიგვითითებს, სად შეგვიძლია დავნიშნოთ ან არ დავნიშნოთ ჩვენი მოქალაქე", — განაცხადა მინისტრმა.

8 მაისს ცნობილი გახდა, რომ რეფორმების აღმასრულებელი კომიტეტის თავმჯდომარის თანამდებობაზე მიხეილ სააკაშვილის დანიშვნის შემდეგ უკრაინაში საქართველოს ელჩს კონსულტაციებისთვის გამოიძახებენ. ამის შესახებ საგარეო საქმეთა მინისტრმა, დავით ზალკალიანმა განაცხადა.

მიხეილ სააკაშვილი უკრაინის რეფორმების აღმასრულებელი კომიტეტის თავმჯდომარედ 7 მაისს დაინიშნა. გადაწყვეტილებას ხელი პრეზიდენტმა მოაწერა.

22 აპრილს მიხეილ სააკაშვილმა განაცხადა, რომ უკრაინის პრეზიდენტმა ვოლოდიმირ ზელენსკიმ მას რეფორმების საკითხებში ვიცე-პრემიერის პოსტი შესთავაზა. ეს საკითხი ქართული ოცნებისთვის უკრაინასთან დიპლომატიური ურთიერთობის გადახედვის საბაბი გახდა. მთავრობისა და პარლამენტში მმართველი გუნდის ლიდერებმა უკრაინელ კოლეგებს უთხრეს, რომ ეს მათ შორის ნდობას შეარყევდა და კატეგორიულად მიუღებელი იყო. ერთი კვირის შემდეგ კი რადაში ხალხის მსახურის ფრაქციის ლიდერმა, დავიდ არახამიამ განაცხადა, რომ სააკაშვილისთვის მუშაობის ახალი ფორმატი იპოვეს.

ამავე თემაზე:

რეფორმების ეროვნული საბჭო 2014 წელს მაშინდელი პრეზიდენტის, პეტრო პოროშენკოს ბრძანებით შეიქმნა. საბჭოს წევრებს პერსონალურად უკრაინის პრეზიდენტი ნიშნავს. დოიჩე ველეს ინფორმაციით, 2014-2018 წლებში საბჭომ სულ 28 სხდომა ჩაატარა. ბოლო სხდომა კი 2018 წლის მარტში გაიმართა.

პეტრო პოროშენკოს პრეზიდენტობის დროს მიხეილ სააკაშვილი ოდესის გუბერნატორის პოსტს იკავებდა. თუმცა, მას შემდეგ, რაც სააკაშვილმა კორუფციაზე საუბარი დაიწყო, თანამდებობა დატოვა და ოპოზიციაში გადავიდა, პოროშენკოს განკარგულებით მოქალაქეობა ჩამოართვეს და მის წინააღმდეგ სისხლისსამართლებრივი დევნა დაიწყეს. პრეზიდენტის ბრძანებით, ის რეადმისიით პოლონეთში დააბრუნეს. საპრეზიდენტო არჩევნებში გამარჯვების შემდეგ, ვოლოდიმირ ზელენსკიმ სააკაშვილს მოქალაქეობა დაუბრუნა, რის შემდეგ ის უკრაინაში დაბრუნდა.