აჭარის მაუწყებელში სუს-ია — ამ სლოგანით ტელეკომპანიის ჟურნალისტებმა კიდევ ერთხელ გამოუცხადეს პროტესტი დირექტორ გიორგი კოხრეიძეს. ვიდეოს ნახვა მაუწყებლის ვებგვერდზე შეგიძლიათ.

თანამშრომლებმა პირდაპირ ეთერში პროტესტი წუთიერი დუმილით გამოხატეს, ამ დროს მათ ხელში ქაღალდები ეჭირათ, წარწერით "აჭარის მაუწყებელში სუს-ია".

"ჩვენ ახალი ამბების გუნდის, ჰეშთეგის და ბევრი სხვა გადაცემის სახელით გვინდა, 1-წუთიანი დუმილის უფლებით ვისარგებლოთ და ამ დუმილის ფორმატით გამოვხატოთ პროტესტი იმ პროცესის მიმართ, რაც აჭარის ტელევიზიაში მიმდინარეობს. ჩვენ რამდენიმე თვეა ვსაუბრობთ იმაზე, რომ მაუწყებლის სარედაქციო პოლიტიკაზე ღია შტურმი მიმდინარეობს. ადამიანებს დევნიან სხვადასხვა ფორმით. აშანტაჟებენ, ათავისუფლებენ სამსახურიდან და ამ ყველაფერში, რა თქმა უნდა, ჩართულია მაუწყებლის დირექტორი და მრჩეველთა საბჭოს სამი წევრი ქართული ოცნებიდან. ჩვენი პროტესტი გვინდა გამოვხატოთ 1-წუთიანი დუმილით", — განაცხადა გადაცემა მთავარის წამყვანმა თეონა ბაკურიძემ.

დღეს კოხრეიძემ სამსახურიდან გაათავისუფლა საზოგადოებრივი მაუწყებლის აჭარის ტელევიზიისა და რადიოს საინფორმაციო სამსახურის უფროსი, შორენა ღლონტი.

ამ ყველაფერს წინ უსწრებდა ქართული ოცნებისგან დაკომპლექტებული მრჩევლებისგან არჩეული გიორგი კოხრეიძის მიერ დაწყებული რეორგანიზაცია. მან უფლებამოსილება შეუმცირა თავის მოადგილეს, ნათია ზოიძეს, რომელსაც ამ მიზეზით არხიდან წასვლა მოუწია. გარდა ამისა, აღარ გაუგრძელა საინფორმაციო სამსახურის ერთ პროდიუსერს კონტრაქტი, ხოლო მეორეს — მთავარი გამოშვების პროდიუსერს, თანამდებობა გაუუქმა.

ამავე თემაზე: