აჭარის ტელევიზიის დირექტორმა, გიორგი კოხრეიძემ, რომელმაც არჩევიდან რამდენიმე საათში არხს ხელისუფლების მიმართ კრიტიკული ტონი დაუწუნა, არხი საინფორმაციო სამსახურის პროდიუსერს, ნათია შავაძეს დაატოვებინა.

არხის ახალმა დირექტორმა, რომელიც ტელევიზიის სარედაქციო პოლიტიკით უკმაყოფილოა, გადაწყვეტილება "ხელშეკრულების ვადის ამოწურვით" ახსნა. მან გასული წლის 31 დეკემბერს გამოსცა ბრძანება, რომლითაც ერთ დღეში, პირველი იანვრიდან აღარ გააგრძელა.

აჭარის ტელევიზიაში მიმდინარე მოვლენები მოკლედ

საზოგადოებრივი მაუწყებლის აჭარის ტელევიზიას, რომელიც ბოლო წლების განმავლობაში საერთაშორისო თუ ადგილობრივი ორგანიზაციების ანგარიშებში თავს იწონებდა, დირექტორი შეუცვალეს. ნათია კაპანაძე პრიორიტეტების შეუსრულებლობისა და ხელფასების საკითხის მიზეზით გაუშვეს. მის ნაცვლად მმართველი პარტიისგან დაკომპლექტებულმა საბჭომ კაპანაძის კრიტიკით გამორჩეული გიორგი კოხრეიძე დანიშნა.

კაპანაძე იმპიჩმენტის პროცესის დაწყების დროს ტელევიზიის სარედაქციო პოლიტიკაში ჩარევის საფრთხეს ხედავდა. მაშინ, როცა თანამშრომლებისგან მხარდაჭერას ელოდა, მათმა ნაწილმა მის საწინააღმდეგოდ ხელმოწერების შეგროვება დაიწყეს. ერთ-ერთი მათგანი, თამილა დოლიძე რამდენიმე თვეში ქართულმა ოცნებამ ამავე ტელევიზიის მრჩეველად შეარჩია.

უკვე ერთი თვეა, რაც ტელევიზიას გიორგი კოხრეიძე მართავს — დირექტორი, რომლის მიმართაც თანამშრომლებს კითხვები ჰქონდათ და რჩებათ. მან არჩევიდან რამდენიმე საათში არხის ჟურნალისტებს ხელისუფლების მიმართ კრიტიკა დაუწუნა. ჟურნალისტები სარედაქციო დამოუკიდებლობის გარანტად წინა დირექტორის მიერ პირველ მოადგილედ დანიშნულ ნათია ზოიძეს მიიჩნევდნენ, კოხრეიძემ კი მას უფლებამოსილება შეუმცირა.