სახელმწიფო უსაფრთხოების სამსახურის ანალიტიკური დეპარტამენტის უფროსის მოადგილე, ირაკლი ანთიძე ამბობს, რომ ვაჟა გაფრინდაშვილის ჯანმრთელობის მდგომარეობა კარგია. გათავისუფლებული ექიმი ამჟამად ცენტრალური ხელისუფლების მიერ კონტროლირებად ტერიტორიაზეა. სუს-ის წარმომადგენელი სხვა დეტალებზე ჟურნალისტებთან არ საუბრობს.

დღეს, 28 დეკემბერს 48-დღიანი პატიმრობის შემდეგ ექიმი ვაჟა გაფრინდაშვილი საოკუპაციო ძალებმა გაათავისუფლეს. ამის შესახებ ინფორმაცია On.ge სახელმწიფო უსაფრთხოების სამსახურში დაუდასტურეს:

"საოკუპაციო ძალების მიერ 9 ნოემბერს დაკავებული ექიმი ვაჟა გაფრინდაშვილი გათავისუფლებულია. ამჟამად იგი საქართველოს ცენტრალური ხელისუფლების მიერ კონტროლირებად ტერიტორიაზე იმყოფება".

ექიმი საოკუპაციო ძალებმა კასპის რაიონში 9 ნოემბერს დააკავეს. ის ოკუპირებულ ტერიტორიაზე ავადმყოფი ქალის დასახმარებლად გადავიდა, რომელიც თბილისში სამკურნალოდ ვერ ჩამოდიოდა. ოკუპირებულ ახალგორში მცხოვრები 60 წლის ქალი ჭაში ჩავარდა და დაზიანებები მიიღო, თუმცა თბილისში ვერ გადაიყვანეს, რადგან საოკუპაციო რეჟიმს ე.წ. გამშვები პუნქტი ჩაკეტილი ჰქონდა.

საოკუპაციო რეჟიმმა ექიმ ვაჟა გაფრინდაშვილს 1 წლითა და 9 თვით უკანონო პატიმრობა მიუსაჯა. დე ფაქტო სასამართლომ ეს გადაწყვეტილება იმის გამო მიიღო, რომ გაფრინდაშვილი ე.წ. საზღვრის კვეთას არ აღიარებს და აცხადებს, რომ საქართველოს ტერიტორიაზე იმყოფება.