თბილისის საქალაქო სასამართლოში მიმდინარე ცოტნე გამსახურდიას მკვლელობის მცდელობის საქმის პროცესზე ბრალდებულმა გიორგი სოლოღაშვილმა ბრალი აღიარა. იგი აცხადებს, რომ მზადაა გამოძიებასთან ითანამშრომლოს. დღეს, 22 დეკემბერს სასამართლოში ბრალდებულებისთვის აღკვეთის ღონისძიების შეფარდების საკითხზე მსჯელობენ.

"მე და ცოტნეს შორის შელაპარალება მოხდა, რის შემდეგაც თავი ავარიდე, სახლისკენ მოვდიოდით მე, ჩემი ძმა ტატო. დამეწია გზაში ცოტნე გამსახურდია და დამარტყა ხელი, რის შემდეგაც სასაფლაოზე ღვინო მქონდა წაღებული, დანაც მქონდა, რომელიც აფექტში ამოვიღე და მე მივაყენე ჭრილობები დანით. ამ ბიჭებს არ მიუყენებიათ დანით ჭრილობა. მე ვარ დამნაშავე და ვაღიარებ დანაშაულს", — თქვა გიორგი სოლოღაშვილმა სასამართლოში.

ცოტნე გამსახურდიას დამამძიმებელ გარემოებაში ჯგუფურად ჩადენილი განზრახ მკვლელობის მცდელობის ბრალდებით დაკავებულია ორი პირი, ხოლო დანაშაულის შეუტყობინებლობის ბრალდებით სამი პირი.

საქართველოს პირველი პრეზიდენტის, ზვიად გამსახურდიას შვილი, ცოტნე გამსახურდია 19 დეკემბრის საღამოს დაჭრეს. შემთხვევა თბილისში, ვერაზე მოხდა. ინციდენტის შემდეგ ცოტნე გამსახურდიას გულმკერდის არესა და თავის ტვინზე ორი ოპერაცია ჩაუტარდა. ამჟამად მისი მდგომარეობა სტაბილურია, მაგრამ მძიმე.