13 დეკემბერს თბილისში სასტუმრო Rooms Hotel-ში წარადგინეს ილიას სახელმწიფო უნივერსიტეტის სამედიცინო პროგრამა, გაიმართა კონფერენცია "დიალოგი: განათლება და ჯანდაცვა". კონფერენციის პირველი ნაწილი იმ გამოწვევების განხილვას დაეთმო, რომლებიც საქართველოში სამედიცინო განათლების წინაშე დგას, ხოლო მეორე ნაწილი – ქვეყნის ჯანდაცვის სფეროში არსებულ გამოწვევათა განხილვას.

შეხვედრაზე კოლეგებმა და ჟურნალისტებმა სოლიდარობა გამოუცხადეს, ოკუპირებულ ტერიტორიაზე დაკავებულ ექიმ ვაჟა გაფრინდაშვილს. კონფერენციაში დარგის წამყვანმა ქართველმა და უცხოელმა ექსპერტებმა მიიღეს მონაწილეობა, რომლებმაც იმსჯელეს თანამედროვე მედიცინის საგანმანათლებლო პროგრამებისა და პრაქტიკის საკითხებზე. ილიას სახელმწიფო უნივერსიტეტის მედიცინის სკოლასა და სამედიცინო ორგანიზაციებს ევექსსა და პინეოს შორის ურთიერთანამშრომლობის მემორანდუმი გაფორმდა.

"ილიას სახელმწიფო უნივერსიტეტის მედიცინის სკოლის ერთ-ერთი პარტნიორი იქნება პინეოს სამედიცინო ეკოსისტემა. პინეო მონაწილეობას მიიღებს დიპლომამდელი სტუდენტების მომზადებაში, ეს გულისხმობს სხვადასხვა მოდულების განხორციელებას კლინიკის ფარგლებში და ასევე იქნება კვლევითი ნაწილი ჯანდაცვის და სამედიცინო განათლების მწვავე და აქტუალურ საკითხებზე", — აცხადებს პინეოს წარმომადგენელი.

ილიას სახელმწიფო უნივერსიტეტის მედიცინის პროგრამის ხელმძღვანელი, 2016 წლის საუკეთესო ახალგაზრდა მეცნიერი ივანე აბიათარი იქნება.

"ამ პროგრამის აკრედიტირება ჩვენმა უნივერსიტეტმა დაიწყო მიმდინარე წელს, ეს მიმართულება ჩვენთვის პრიორიტეტულია და გვინდა განვავითაროთ მედიცინის სკოლა. დღევანდელი კონფერენციის მიზანია სამედიცინო განათლების სფეროსა და ჯანდაცვის სფეროს შორის კომუნიკაციის გაძლიერება", — ივანე აბიათარი.