ჰერითიჯის ფონდის მკვლევარი, ლუკ კოფი ტვიტერის საკუთარ გვერდზე წერს, რომ მისი ახალი ინიციატივით, სირიიდან წამოსული აშშ-ს ჯარი საქართველოში, კერძოდ, ახალქალაქში შეიძლება გაიგზავნოს.

"შეთავაზება: ამერიკის შეერთებული შტატების ჯარი სირიას ტოვებს და ისინი შეიძლება საქართველოში გაგზავნონ, რათა "ჰორიზონტს მიღმა" ძალად იქცნენ. მათ შეეძლებათ ისლამურ სახელმწიფოს სწრაფად უპასუხონ, თუკი იგი ისევ გაძლიერდება.

აშშ-ს შეუძლია, გამოიყენოს ძველი რუსული ბაზა ახალქალაქში, რომელიც სულ რაღაც 740 კმ-ით არის დაშორებული რაქადან. ახლა საქართველო უფრო საიმედოა, ვიდრე ერაყი", — წერს ლუკ კოფი.

ლუკ კოფის ერთ-ერთი ინიციატივაა, ასევე, საქართველოს ნატოში დაჩქარებული გაწევრიანების მეთოდი. იგი განმარტავს, რომ მისი წინადადება არ აყენებს საქართველოს ტერიტორიულ მთლიანობას კითხვის ნიშნის ქვეშ. ლუკ კოფის თქმით, საქართველო აფხაზეთისა და ცხინვალის რეგიონის ჩათვლით, შედის ნატოში და მხოლოდ ნატოს მეხუთე მუხლი არ შეეხება ოკუპირებულ ტერიტორიებს მანამ, სანამ კონფლიქტი და ოკუპაცია მშვიდობიანად არ მოგვარდება.