პატრიოტთა ალიანსის დეპუტატის, ირმა ინაშვილის შემდეგ დევიდ კრამერს ქცევას უმრავლესობის დეპუტატი გია ვოლსკი უწუნებს. მისივე მტკიცებით, კრამერის მოქმედება "არაჯენტლმენური, არაეთიკური და არადიპლომატიური" იყო. გარდა ამისა ვოლსკი ამბობს, რომ კრამერის ქმედებების აშშ-სთან დაკავშირება საზოგადოებისთვის დამაზიანებელია.

"აშშ ამ შემთხვევაში არაფერ შუაში არაა. აბსოლუტურად დამაზიანებელია საზოგადოებისთვის ისეთი ინფორმაციის მიწოდება, თითქოსდა კრამერი, რომელიც არაჯენტლმენურად, არასწორად და არადიპლომატიურად მოიქცა, რამენაირად დაკავშირებულია შეერთებულ შტატებთან. მისი მოქმედება იყო შეცდომა და დამაზიანებელი იმ ფორუმისათვის. ეს არ ნიშნავს, რომ პატრიოტთა ალიანსი სწორად მოიქცა. აშშ-ს საქართველოსადმი დამოკიდებულებას არანაირად არ განსაზღვრავს არც კრამერის მოქმედება და არც პატრიოტთა ალიანსის ლოზუნგები", — განაცხადა ვოლსკიმ.

10 სექტემბერს თბილისში, სასტუმრო რუმსში ეკონომიკური პოლიტიკის კვლევის ცენტრისა და მაკკეინის ინსტიტუტის მიერ ორგანიზებულ კონფერენციაზე ირმა ინაშვილის დაუპატიჟებლად მისვლას ხმაური და დაპირისპირება მოჰყვა. კონფერენციის ორგანიზატორებმა ინაშვილს განუმარტეს, რომ ის არ იყო სიაში, შესაბამისად, კონფერენცია უნდა დაეტოვებინა. კონფერენციის დატოვებისკენ მოუწოდა აშშ-ის სახელმწიფო მდივნის ყოფილმა თანაშემწემ, დევიდ კრამერმაც. ინაშვილმა თქვა, რომ წინა დღეს ამავე კონფერენციაზე დეპუტატმა გიგა ბოკერიამ მისი მისამართით ცილისმწამებლური განცხადება გააკეთა და ის პასუხის გასაცემად მივიდა. სტუმრების ნაწილმა აღნიშნა, რომ ირმა ინაშვილის ქმედება მიუღებელი იყო.

დაპირისპირების შემდეგ ირმა ინაშვილი სიტყვით მაინც გამოვიდა. როგორც მან განაცხადა, მისი პარტია პროდასავლური აზროვნებისაა. სიტყვით გამოსვლისას მან დევიდ კრამერისგან ბოდიშის მოხდაც მოითხოვა.

ირმა ინაშვილის პარტია ანტიდასავლური, პრორუსული, ჰომოფობიური და ქსენოფობიური რიტორიკით გამოირჩევა. ისინი სამხედრო მიუმხრობლობას ითხოვენ. გარდა ამისა, პარტიის წევრები ვიზიტებს მართავენ მოსკოვში და საქართველოს ხელისუფლებას რუსეთთან ღია დიალოგისკენ მოუწოდებენ.

ბოდიშის მოხდის გარდა ინაშვილი ე.წ. კრამერის სიას მოამზადებს, რომელსაც პარლამენტს წარუდგენს. მისივე თქმით, ამავე სიაში შევა მეთიუ ბრაიზა, რომელიც ამერიკელი დიპლომატი და სახელმწიფო დეპარტამენტის ყოფილი მაღალჩინოსანია.

ამავე თემაზე: