უკრაინის საგარეო საქმეთა სამინისტრომ დაგმო ოკუპირებულ აფხაზეთში ე.წ. საპრეზიდენტო არჩევნების ჩატარება. უწყება აცხადებს, რომ ეს ყალბი არჩევნები რუსეთის მორიგი პროვოკაციაა და მიზნად ისახავს პრორუსული სეპარატისტული ძალების ლეგიტიმაციას.

ისინი მოუწოდებენ რუსეთის ფედერაციას, რომ პატივი სცეს და შეასრულოს საერთაშორისო სამართალი და გადახედოს გადაწყვეტილებას საქართველოს ოკუპირებული ტერიტორიების დამოუკიდებელ სახელმწიფოებად აღიარების შესახებ.

ოკუპირებულ აფხაზეთში დე ფაქტო საპრეზიდენტო არჩევნები გუშინ, 25 აგვისტოს გაიმართა. შედეგებიდან გამომდინარე მეორე ტური დაინიშნება.

მეორე ტურში ერთმანეთს მოქმედი დე ფაქტო პრეზიდენტი, რაულ ხაჯიმბა და ოპოზიციონერი ალხას კვიციანი შეხვდებიან. პირველ ტურში ხაჯიმბამ 26,6 პროცენტი, ხოლო კვიციანმა 24,6 პროცენტი მიიღო.

საქართველოს საგარეო საქმეთა სამინისტრო ოკუპირებულ რეგიონში ე.წ. საპრეზიდენტო არჩევნების ჩატარებას საქართველოს სუვერენიტეტისა და ტერიტორიული მთლიანობის წინააღმდეგ მიმართულ მორიგ უკანონო ქმედებად აფასებს.

უწყება მოუწოდებს რუსეთს, პატივი სცეს ნაკისრ საერთაშორისო ვალდებულებებს, შეასრულოს 2008 წლის 12 აგვისტოს ევროკავშირის შუამავლობით დადებული ცეცხლის შეწყვეტის შეთანხმება და შეცვალოს უკანონო გადაწყვეტილება.