სახეობათა კონსერვაციის სამეცნიერო-კვლევითი ცენტრის, ნაკრესის ცნობით, 20 ივნისის საქმეზე დაკავებულის, ბეჟან ლორთქიფანიძის ჯანმრთელობის მდგომარეობა გაუარესდა. ამ მიზეზით გადაიდო პრესკონფერენცია, რომელიც 20 ივნისის საქმეზე დაკავებულებს ეხებოდა.

"ბეჟანთან და დანარჩენ დაკავებულებთან დაკავშირებული დღეს დაგეგმილი პრესკონფერენცია გადაიდო ორშაბათისთვის (12 აგვისტო). მიზეზი - შეგვატყობინეს, რომ მისი ჯანმრთელბის მდგომარეობა გაუარესდა. ამის გამო, ადვოკატს გიორგი გელხაურს და ბეჟანის მეუღლეს ეკა ჯაიანს მოუხდათ სასწრაფოდ წასვლა ბეჟანის მდგომარეობის გასარკვევად. ცოტა ხნის წინ შეგვატყობინეს, რომ ახლა მდგომარეობა სტაბილურია. ორშაბათის პრესკონფერენციის საათს მალევე შეგატყობინებთ. გმადლობთ თანადგომისთვის", — ნათქვამია ნაკრესის განცხადებაში.

ბეჟან ლორთქიფანიძე, სახეობათა კონსერვაციის სამეცნიერო-კვლევით ცენტრ ნაკრესის გამგეობის წევრი და კონსერვაციის პროგრამის დირექტორი, დააკავეს და 20-21 ივნისის ღამეს ანტისაოკუპაციო აქციაში მონაწილეობის დროს ჯგუფურ ძალადობრივ ქმედებაში დასდეს ბრალი (სისხლის სამართლის კოდექსის 225-ე მუხლის მეორე ნაწილი). 27 ივნისს კი სასამართლომ დააკმაყოფილა პროკურატურის შუამდგომლობა და მას, აღკვეთის ღონისძიების სახით, წინასწარი პატიმრობა შეუფარდა.