თსუ-ის ახლად არჩეულმა რექტორმა, გია შარვაშიძემ, დღეს სტუდენტებთან შეხვედრის დროს განაცხადა, რომ გარე დაფინანსება უნივერსიტეტისთვის აუცილებელია და ეს მხოლოდ საბიუჯეტო სახსრებით არ უნდა მოხდეს:

"ძალიან მინდა, რომ მაქსიმალური მობილიზება მოხდეს გარე დაფინანსების. არა მხოლოდ საბიუჯეტო სახსრების, არამედ დონორებისა და უნივერსიტეტის კურსდამთავრებულთა მეშვეობით."

უნივერსიტეტის რექტორი სტუდენტებს თსუ-ში არსებული სიტუაციის გამოსწორებას ჰპირდება:

"მე მაქვს იმის ამბიცია, რომ ჩემი რექტორობის პერიოდში ყველა ბაზა მოწესრიგდება. ყველა სასწავლო ბაზა, კვლევითი ბაზა და საცხოვრებელი. შეუძლებელია ნორმალური და სწორი საუნივერსიტეტო ცხოვრების გარეშე მოვიზიდოთ უცხოელი სტუდენტები, რომლებიც ძალიან მოგვწონს, ან გავხდეთ ერთიანი ევროპული სივრცის წევრი. ან იმ ბავშვებმა, რომელთაც არ აქვთ საშუალება თბილისში დაიქირავონ ძვირად ბინა, რა დააშავეს?! მესმის ძალიან კარგად და ამას უნდა ვუპასუხოთ ყველამ ერთად. ეს არ არის მხოლოდ უნივერსიტეტის თემა, სცილდება უნივერსიტეტის ზომას და ფინანსებს."

შარვაშიძის თქმით, რამდენიმე თვის წინ მიმდინარე მოლაპარაკებებს აუდიტორია 115-ის წევრებთან უკვალოდ არ ჩაუვლია და შეთანხმება ძალაში რჩება:

"რაც შეეხება იმ სამ მოთხოვნას, რაზეც შევთანხმდით [განათლების მინისტრის მოადგილეობის პერიოდში] სამივე შემთხვევაში, რასაც ვამბობ არ გადავდივარ, ძალიან ჯიუტი ვარ რაღაცებში. რაც შეეხება რეფორმირებას და რადიკალურ რეფორმირებას - თვითმმართველობა, ის საკითხი, რომ აუცილებელია პირდაპირი არჩევნები იყოს, რასაკვირველია ერთნაირი წვდომა უნდა ჰქონდეს ყველას. კარი არის ღია. ჩვენ გვექნება ძალიან კარგი შანსი, რომ ყველა ერთად დავსხდეთ და ერთობლივი ხედვა შევიმუშავოთ, როგორი უნდა იყოს სტრატეგია უნივერსიტეტის განვითარების. იქნება მცირევადიანი, მოკლევადიანი, საშუალოვადიანი და გრძელვადიანი სტრატეგიული გეგმა. უნივერსიტეტმა უნდა იცოდეს ყოველ ჯერზე, შეასრულა თუ არ შეასრულა მორიგმა მმართველმა თავისი გეგმა. ეს მიიღწევა მხოლოდ იმ შემთხვევაში, თუ ყველა ინდიკატორი იქნება გაზომვადი."

რექტორის განცხადებით, განვითარების სტრატეგია წლის ბოლოს მზად იქნება და მის მომზადებაში მონაწილეობის მიღება ყველა სტუდენტს შეეძლება.

დღეს, აუდიტორია 115-მა თსუ-ში დაგეგმილი ოფიციალური ცერემონია ჩაშალა. მოძრაობის წევრები ამბობდნენ, რომ მათი ძირეული მოთხოვნები რეფორმების შესახებ, არ შესრულდა. აუდიტორია 115-ის მოთხოვნებია:

  • ხარისხიანი და ხელმისაწვდომი განათლება;
  • საუნივერსიტეტო ავტონომია;
  • გარე რეფერირების პრინციპის დანერგვა;
  • სტუდენტური თვითმმართველობების არსებული სტრუქტურის ძირეულ რეფორმა;
  • უნივერსიტეტის 2017 წლის ბიუჯეტში თანხის გამოყოფა სტუდენტური საერთო საცხოვრებლის პირობების გასაუმჯობესებლად;
  • სტუდენტებს, რომელთაც სურთ სწავლის გაგრძელება და თანხის გადაუხდელობის გამო არ ეხსნებათ ბაზა, მიეცეთ აკადემიური რეგისტრაციის შესაძლებლობა.