ნაციონალური მოძრაობის ლიდერი ნიკა მელია აცხადებს, რომ მას სურდა ყოფილიყო ზუგდიდის მერობის კანდიდატი. ამის შესახებ ნიკა მელიამ ტოკ-შოუ რეაქციაში განაცხადა.

ის ამბობს, რომ ქართული ოცნების ინტერესია მასსა და მიხეილ სააკაშვილს შორის განხეთქილება ჩამოაგდოს, თუმცა ნებისმიერი მსგავსი დაპირისპირება "გუნდის ღალატად" მიაჩნია.

"სიმართლე არის ის, რომ ჩემი კანდიდატურა განიხილებოდა და, პირველ რიგში, ვინმე თუ განიხილავდა, მე თვითონ განვიხილავდი ჩემს თავს. როცა ჩემთვის ცნობილი გახდა, რომ რუსლოს სურვილი ჰქონდა ეყარა კენჭი არჩევნებში, რომელსაც მჭიდრო კავშირი აქვს ზუგდიდთან, პირველი, ვინც მხარი დაუჭირა, ვიყავი მე", — განაცხადა ნიკა მელიამ.

ნიკა მელიამ ოპოზიციის ზოგიერთი ლიდერის მხრიდან "წინდაუხედავ განცხადებებზე" არჩევნების დღეს განსხვავებული აქცენტების პირდაპირ ეთერში ისაუბრა. მან თქვა, რომ "ბევრი ოპოზიციური პოლიტიკოსი გამოდის, რომ დავიწყებ რევოლუციას და არ იწყება ეს რევოლუცია", რაც ამომრჩეველს "უარეს სასოწარკვეთაში აგდებს. ნიკა მელიას განცხადებით, გაერთიანებული ოპოზიცია უნდა შეიკრიბოს და ერთად გადაწყვიტონ სამოქმედო გეგმა. მისი თქმით, ემოციურ ფონზე განცხადებები არ უნდა გაკეთდეს.

ნიკა მელიას ამ განცხადებამ აზრთა სხვადასხვაობა გამოიწვია, საზოგადოების ნაწილმა ივარაუდა, რომ ნიკა მელია მიხეილ სააკაშვილსა და სანდრა რულოვსს დაუპირისპირდა, ნაწილმა კი ოპოზიციაში სავარაუდო განხეთქილებაზე დაიწყო საუბარი. ნიკა მელიას ამ გაცხადებას წინ უსწრებდა მიხეილ სააკაშვილისა და სანდრა რულოვსის შემდეგი ფრაზები.

მიხეილ სააკაშვილი: "ჩვენ უნდა ვიყოთ, შეტევაზე, შეტევაზე და მხოლოდ შეტევაზე".

სანდრა რულოვსი: "თქვენ მე არ მიცნობთ. ჩვენ მოგებული გვაქვს პირველი ტური, თუ ისინი გამოაცხადებენ პირველ ტურში გამარჯვებას, მიიღებენ მთელი ქვეყნის პროტესტს, მე ვადასტურებ ამას".

ნიკა მელიას განცხადებას გამოეხმაურა ნაციონალური მოძრაობის წევრი ნუგზარ წიკლაური და თქვა, რომ მელიას განცხადებები "ბიძინა ივანიშვილის პოლიტიკურ წისქვილზე ასხავს წყალს".

იქამდე, სანამ ზუგდიდის მერობის კანდიდატად სანდრა რულოვსი დასახელდებოდა, ნიკა მელიამ თავად დაადასტურა, რომ პარტიაში ზუგდიდის მერობის კანდიდატად განიხილებოდა.