სიცილიის ქალაქ მესინაში მდებარე რეგიონული მუზეუმიდან (MuMe) ბოროტმოქმედებმა რენესანსის ხანის ოსტატის, ანტონელო და მესინას უძვირფასესი ტილოები მოიპარეს. ინფორმაციას Deutsche Welle ავრცელებს.

ძარცვა შაბათს საღამოს, ქალაქში "ფერაგოსტოს" (ღვთისმშობლის მიძინების დღესასწაულის) აღნიშვნისას მოხდა. ქურდებმა მოახერხეს სიგნალიზაციის გვერდის ავლით მუზეუმში შეღწევა და წაიღეს მხატვრის 1473 წლის ცნობილი "წმინდა გრიგოლის პოლიპტიქის" სამი პანელი, ასევე დაჯავშნულ ვიტრინაში დაცული მცირე ზომის ორმხრივი პანელი.

მუზეუმის დირექტორის, მარისა მერკურიოს განცხადებით, ეს არის უზარმაზარი დანაკარგი როგორც მუზეუმისა და ქალაქისთვის, ისე მთელი ხელოვნების სამყაროსთვის, რადგან მოპარული ნამუშევრები მხატვრის შემოქმედებაში განსაკუთრებულ ადგილს იკავებდა.

Deutsche Welle-ს ცნობით, ეს შემთხვევა სულ რამდენიმე დღის შემდეგ მოხდა, რაც იტალიის სამართალდამცავების მიერ პარმის მუზეუმიდან მარტში მოპარული რენუარის, სეზანისა და მატისის 10 მილიონ ევრომდე ღირებულების ნახატები დააბრუნეს. გამოცემა აღნიშნავს, რომ მსგავსი ტიპის ცნობადი ხელოვნების ნიმუშების ლეგალურად გაყიდვა შეუძლებელია და მათ კრიმინალურ სამყაროში ხშირად შავ ბაზარზე გირაოს სახით იყენებენ.