საქართველოს ფინანსთა სამინისტროს საგამოძიებო სამსახურის თანამშრომლებმა სამ სხვადასხვა კორუფციულ დანაშაულზე სამი პირი დააკავეს. უწყების ცნობით, აჭარის სატყეო სააგენტოს ტყის მცველმა სახელმწიფო ტყით სარგებლობის სანაცვლოდ 1 000 დოლარის ოდენობის ქრთამი აიღო, სურსათის ეროვნული სააგენტოს ვეტერინარმა დაურეგისტრირებელი საქონლის რეგისტრაციაში 650 ლარი გამოართვა მოქალაქეს, ხოლო მყარი ნარჩენების მართვის კომპანიის ოპერატორმა ქვემო ქართლის ნაგავსაყრელზე ნარჩენების უნებართვო განთავსებისთვის 500 ლარი მოსთხოვა მოქალაქეს.

უწყების განცხადებით, გამოძიება ქრთამის აღებისა და კომერციული მოსყიდვის მუხლებით მიმდინარეობს.

პირველ საქმეზე გამოძიებით დადგინდა, რომ აჭარის სატყეო სააგენტოს წარმომადგენელმა ხულოში, სახელმწიფო ტყის ნაკვეთით სარგებლობის ნებართვის სანაცვლოდ, მოქალაქეს 1 000 აშშ დოლარი გამოართვა. სამართალდამცავებმა ის უშუალოდ თანხის გადაცემის დროს აიყვანეს.

"ერთ-ერთი სისხლის სამართლის საქმის გამოძიებით დადგინდა, რომ აჭარის სატყეო სააგენტოს ხულოს სატყეო ადმინისტრაციის ტყის მცველმა ნ.ბ.-მ, სახელმწიფო ტყის ფონდის ნაკვეთით სარგებლობის სანაცვლოდ, მოქალაქეს ქრთამის სახით 1 000 აშშ დოლარი გამოართვა. იგი თანხის აღების მომენტში, დანაშაულის ადგილზე დააკავეს", — აღნიშნულია უწყების განცხადებაში.

მეორე ეპიზოდი სურსათის ეროვნული სააგენტოს რეგიონულ ვეტერინარს უკავშირდება, რომელმაც დაურეგისტრირებელი პირუტყვის უკანონო იდენტიფიკაცია-რეგისტრაციაში ქრთამის სახით 650 ლარი აიღო. აღნიშნულ ორ საქმეზე გამოძიება სსკ-ის 338-ე მუხლით მიმდინარეობს, რაც 6-დან 9 წლამდე პატიმრობას ითვალისწინებს.

"მეორე სისხლის სამართლის საქმეზე ჩატარებული გამოძიებით გამოვლინდა, რომ სურსათის ეროვნული სააგენტოს რაჭა-ლეჩხუმისა და ქვემო სვანეთის რეგიონული სამსახურის ვეტერინარმა ა.ლ.-მ, დადგენილი პროცედურების გვერდის ავლით, დაურეგისტრირებელი საქონლის იდენტიფიკაცია-რეგისტრაციის სანაცვლოდ მოქალაქეს ქრთამის სახით 650 ლარი გამოართვა.

გამოძიება საქართველოს სისხლის სამართლის კოდექსის 338-ე მუხლის პირველი ნაწილით ქრთამის აღების ფაქტზე მიმდინარეობს, რაც სასჯელის სახით 6-დან 9 წლამდე ვადით თავისუფლების აღკვეთას ითვალისწინებს", — აღნიშნულია განცხადებაში.

მესამე შემთხვევაში, შპს "საქართველოს მყარი ნარჩენების მართვის კომპანიის" ოპერატორმა ქვემო ქართლის ნაგავსაყრელზე ნარჩენების უნებართვოდ დაყრის სანაცვლოდ მოქალაქეს 500 ლარი მოსთხოვა და გამოართვა. იგი საგამოძიებო სამსახურმა ადგილზე დააკავა. საქმეზე გამოძიება კომერციული მოსყიდვის (სსკ-ის 221-ე მუხლი) მუხლით მიმდინარეობს.

"მესამე სისხლის სამართლის საქმეზე გამოძიებით დადგინდა, რომ შპს "საქართველოს მყარი ნარჩენების მართვის კომპანიის" ოპერატორმა ბ.ზ.-მ, ქვემო ქართლის რეგიონში მდებარე ნაგავსაყრელზე ნარჩენების უნებართვო განთავსების სანაცვლოდ, მოქალაქეს 500 ლარი მოსთხოვა და გამოართვა, რა დროსაც საგამოძიებო სამსახურის თანამშრომლებმა დააკავეს.

მესამე სისხლის სამართლის საქმეზე გამოძიება საქართველოს სისხლის სამართლის კოდექსის 221-ე მუხლით-კომერციული მოსყიდვის ფაქტზე მიმდინარეობს", — წერს უწყება.