თავისუფლების მოედანმა პოლიტიკური ექსპედიცია აღმოსავლეთ საქართველოს მთიანეთში დაახლოებით 2 კვირის წინ, 2 აგვისტოს, დაიწყო. პანკისისა და თუშეთის შემდეგ, პარტიის წევრები ხევსურეთში, ბარისახოში ჩავიდნენ, სადაც ადგილობრივ მოსახლეობას ხვდებიან. ექსპედიციის ფარგლებში მოინახულებენ ხევს და ფშავსაც. მანამდე "თავისუფლების მოედნის" ექსპედიცია იმყოფებოდა იმერეთში, აჭარაში, სამეგრელოსა და კახეთში.

2 აგვისტოს გავრცელებულ ვიდეო მიმართვაში პარტიის ლიდერი ლევან ცუცქირიძე განმარტავს, რატომ გადაწყვიტეს პოლიტიკური ექსპედიციის დაწყება. მისი თქმით, ამ გზით სურთ, რომ აღმოაჩინონ ის საკითხები, რომლებიც აწუხებთ ადამიანებს და აღმოაჩინონ "ის ადამიანები, რომლებიც ჩვენი სახელმწიფოებრიობის ნამდვილი მეციხოვნეები არიან".

"თქვენ შეიძლება დაინტერესდეთ, რატომ დავარქვით ამას და რატომ წამოვედით პოლიტიკურ ექსპედიციაში. უპირველეს ყოვლისა იმიტომ, რომ რაც არ უნდა წაიკითხო, რაც არ უნდა უყურო შორიდან იმ ამბებს, რაც ხდება მთაში, მაინც ნებისმიერ მოქალაქეს, მით უმეტეს პოლიტიკოსს, სჭირდება აღმოჩენა. აღმოჩენა იმ საკითხების, რომლებიც აქ აწუხებთ ადამიანებს; აღმოჩენა იმ ადამიანების, რომლებიც არიან ნამდვილი მეციხოვნეები ჩვენი სახელმწიფოებრიობის. აქ ზოგჯერ სოფელში შეიძლება ერთი ადამიანი ან ერთი ოჯახი ცხოვრობდეს, მაგრამ მათი იქიდან წამოსვლა შეიძლება ნიშნავდეს კიდევ მეტი მიწის დაკარგვას საქართველოსთვის.

ამის გამო ეს აღმოჩენებისთვისაც კეთდება, იმისთვის, რომ ჩვენ აღმოვაჩინოთ ეს ადამიანები, აღმოვაჩინოთ ის პრობლემები, რომლებიც შეიძლება არ ვიცოდით რომ არსებობს და გავაგებინოთ ეს საზოგადოებას და გავხადოთ პოლიტიკური ცხოვრების ნაწილი ეს ყველაფერი", — აცხადებს ვიდეომიმართვაში ლევან ცუცქირიძე.

ფოტო: ლევან ცუცქირიძე/FB