12 აგვისტოს ღამეს გომის მთაზე ტურისტების მიკროავტობუსი ხრამში გადავარდა, რის შედეგადაც 4 მგზავრი ადგილზე დაიღუპა.

ბათუმის რესპუბლიკური საავადმყოფოს ექიმის, გია კიკაბიძის ცნობით, კლინიკაში 11 პირი გადაიყვანეს, მათ შორის 6 — არასრულწლოვანია. დაშავებულები ბელარუსის მოქალაქეები არიან.

"დილის 05:00 საათზე შემოიყვანეს 11 პაციენტი, მათ შორის 6 ბავშვია. მათი მდგომარეობა სტაბილურად ფასდება; მართვით სუნთქვაზე არცერთი მათგანი არ იმყოფება. ინტენსიურ თერაპიაში მყოფებს მცირე ზომის სისხლჩაქცევები უფიქსირდებათ, კონტაქტურები არიან და საოპერაციო არცერთი მათგანი არ არის. ბავშვების კლინიკიდან გაყვანა შესაძლებელია, თუმცა ჯერ არ ვიცით, ზოგ მათგანს მშობლები სად ჰყავს — რამდენიმე ბავშვის მშობელი ჩვენს კლინიკაშია მოთავსებული. ბავშვების ასაკი 4-დან 15 წლამდეა," — განაცხადა ექიმმა IPN-თან საუბრისას.

IPN-ის ცნობით, მიკროავტობუსს საქართველოს მოქალაქე მართავდა; მის სიცოცხლეს საფრთხე არ ემუქრება. გავრცელებული ინფორმაციით, ავარიის მიზეზი მუხრუჭების გაუმართაობა გახდა — მძღოლმა სატრანსპორტო საშუალება ვერ დაიმორჩილა.

შსს-გამოძიება 276-ე მუხლით დაიწყო, რაც სატრანსპორტო მოძრაობისას წესების დარღვევას გულისხმობს, რამაც ადამიანის სიცოცხლის მოსპობა გამოიწვია.