სტატია შეიცავს სპოილერებს House of the Dragon-ის მესამე სეზონიდან.

დრაკონის სახლის მე-3 სეზონის ფინალმა შემდეგი სეზონისთვის უკვე შეგვამზადა. მერვე სერიაში ერთ-ერთი ასეთი მოვლენა ჰელენა ტარგარიენის (ფია საბანი) სიკვდილი იყო: რეინირას მიერ დატყვევებული ჰელენა ფანჯრიდან გადახტა და სიცოცხლე ასე დაასრულა. თუმცა, როცა მსახიობმა პერსონაჟის სიკვდილის შესახებ გაიგო, არ დასევდიანებულა და აღნიშნა, რომ მისთვის ეს დიდი პატივია.

საბანის თქმით, ის ისედაც ხვდებოდა, რომ სერიალში მისი დღეები დათვლილი იყო, რადგან ეკრანზე ჰელენას პერსონაჟმა იმაზე დიდხანს იცოცხლა, ვიდრე წიგნში. "სერიალის შემქმნელებთან არაფორმალური საუბრებისას ხშირად ვამბობდი ხოლმე: 'კარგით რა, ხომ ვიცი, როდის უნდა მოვკვდე''', — იხსენებს მსახიობი.

ფოტო: HBO

მიუხედავად ამისა, სერიალის შოურანერმა, რაიან კონდალმა, მსახიობს მაინც დაურეკა, რათა ეს ამბავი ოფიციალურად ეცნობებინა. საბანის თქმით, ეს მომენტი მისთვის ძალიან ამაღელვებელი და ამავდროულად, საინტერესოც იყო. "ჩემთვის დიდი პატივია ამ სატელევიზიო სამყაროში სიკვდილი. ასე რომ, ამით ერთი დიდი ოცნებაც ავიხდინე", — დასძინა მსახიობმა სამეფო კარის თამაშების სასტიკ სამყაროზე საუბრისას.

ცოტახნის წინ სერიალის მე-5 და მე-7 ეპიზოდების რეჟისორმა, ნინა ლოპეს-კორადომ, დრაკონის სახლის მიმართ კრიტიკას უპასუხა. წიგნისგან განსხვავებით, სერიალში არაერთი ცვლილებაა პერსონაჟების სიუჟეტურ ხაზში, რაც ფანებს დიდად არ მოსწონთ. თავად ჯორჯ მარტინი დრაკონის სახლს უკვე გაემიჯნა, რის მიზეზადაც შოურანერ რაიან კონდალთან უთანხმოება და სცენარში შეტანილი ცვლილებები დაასახელა.

ფოტო: HBO

"მეშვიდე სერიაში წიგნის სიუჟეტიდან ცოტათი მართლაც გადავუხვიეთ. თუმცა, ჩემი აზრით, რაიანისა და სცენარისტების ნამუშევარმა პერსონაჟების სიუჟეტური ხაზები იმაზე მეტად განავითარა, ვიდრე ეს წიგნებში იყო მოცემული. ვიცი, რომ წიგნის ერთგული ფანებისთვის ეს ძალიან საკამათო განცხადებაა, თუმცა მიმაჩნია, რომ მეშვიდე სერიის ის სიუჟეტური ხაზები, რომლებიც მერვე სერიაშიც გაგრძელდება, როგორც სცენარისტებმა, ისე მსახიობებმა ბრწყინვალედ შეასრულეს", — განაცხადა ნინა ლოპეს-კორადომ.

დრაკონის სახლი მე-4 სეზონით დასრულდება.

ასევე იხილეთ:

თუ სერიალებს თვალს აქტიურად ადევნებ, არ დაგავიწყდეს, შემოიხედო ჩვენს ჯგუფშიც – ერთი სერიაც და…