რეგიონული პოლიტიკის საკითხებში სახელმწიფო მინისტრმა, მამუკა მდინარაძემ ჟურნალისტებთან განაცხადა, რომ არ გამორიცხავს, ახალ პოსტზე დიდხანს არ დარჩეს და სადაც გამოწვევა იქნება, იქ გადაინაცვლებს.

"როცა მეუბნებიან, აქ გვჭირდებიო, მართლა გულწრფელად მიხარია. ირაკლი კობახიძესთან ასეთი საუბარი მართლაც შედგა, დასამალი არაფერია — რომ გამოწვევა დღეს აქ არის და გამკლავება სჭირდება. თუ პრემიერის აზრი არის ის, რომ ამ გამოწვევას ჩემზე კარგად ბევრი ვერ გაართმევს თავს, დიდი სიამოვნებით შევუდგები ყველა გამოწვევასა და იმ დავალების შესრულებას, რაც ქართული ოცნების გუნდს ექნება — რომ რეგიონებში გავაძლიერო ბევრი იმ საქმის კეთება, რაც დაწყებულია და რასაც კიდევ უფრო მეტი მონდომება, სისტემურად კარგი მენეჯმენტი, ბიუროკრატიული ელემენტების შემცირება და ა.შ. სჭირდება. [...]

არ გამოვრიცხავ, რომ ჩემი ამ პოსტზე ყოფნა დიდი ხანი არ იყოს. იქიდან გამომდინარე, რომ ამ შემთხვევაში ჩემი მთავარი მისია გარკვეული საკითხების გამართვა, მენეჯმენტის დახვეწა და რელსებზე დაყენებაა. შემდეგ, თუ უფრო მეტი გამოწვევა სხვაგან იქნება, შეიძლება იქაც გადავინაცვლო," — განაცხადა მდინარაძემ.

შეგახსენებთ, 30 ივლისის ბრიფინგზე ცნობილი გახდა, რომ რეგიონული პოლიტიკის საკითხებში სახელმწიფო მინისტრის თანამდებობა შეიქმნა და ამ პოსტზე სამართალდამცავი ორგანოების კოორდინაციის საკითხებში სახელმწიფო მინისტრი მამუკა მდინარაძე დაინიშნა. ამასთან, ის კვლავ შეინარჩუნებს ვიცეპრემიერის პოსტს.