თბილისის მერის, კახა კალაძის განცხადებით, რუსულენოვანი ბლოგერისთვის მოკლე ინტერვიუს მიცემაში პრობლემას ვერ ხედავს. მედიასთან საუბრისას მან განმარტა, რომ ბლოგერს რამდენიმე დღის წინ, ქალაქში გადაადგილებისას სრულიად შემთხვევით შეხვდა.

მერის თქმით, რადგან სიუჟეტი თბილისს ეხებოდა, მან ჟურნალისტის/ბლოგერის კითხვებს უპასუხა, ხაზი გაუსვა დედაქალაქის ღირსშესანიშნაობებსა და ქართულ სტუმარმასპინძლობას.

"არ ვიცი ეს კონკრეტული ადამიანი ბლოგერია თუ ჟურნალისტი. რამდენიმე დღის წინ, მუნიციპალიტეტის სამუშაოებზე ვიმყოფებოდი. შემდეგ ერთ-ერთ კაფეში ყავის საყიდლად შევედი. აბსოლუტურად შემთხვევით შევხვდი ამ ქალბატონს. მითხრა, რომ თბილისზე სიუჟეტს ვაკეთებო და შეკითხვები დამისვა. ამაში პრობლემას ვერ ვხედავ. მე ახლაც ვიტყვი, რომ ყველას, ვისაც სურვილი აქვს ჩვენს ქვეყანაში სტუმრობის, ნებისმიერ დროს შეუძლია ჩამოსვლა, მიუხედავად მისი წარმოშობისა. რუსი იქნება, უკრაინელი, იტალიელი, ამერიკელი თუ სხვა ქვეყნის წარმომადგენელი, ყველას შეუძლია ჩამოსვლა და სასიამოვნო დღეების გატარება. ისინი დახარჯავენ ფულს, ეს წაადგება ჩვენს ეკონომიკას და იმ ადამიანებს, ვინც ტურიზმის სფეროში საქმიანობენ.

შეკითხვა შეეხებოდა სტუმარმასპინძლობას და მეც ვუპასუხე. რა თქმა უნდა, ტრადიციული საჭმელების გარდა, ჩვენ ბევრი ღირსშესანიშნაობა გვაქვს. სწორედ ამიტომ არის ჩვენი ქვეყანა საინტერესო და ამიტომ აქვთ მსოფლიოს სხვადასხვა ქვეყნიდან ჩამოსულ სტუმრებს ინტერესი. მათ შორის ჩვენი სამზარეულო და ქართული ღვინო სარგებლობს დიდი პოპულარობით, რადგან ეს არის ჩვენი კულტურის, ადათ-წესების ნაწილი", — თქვა კალაძემ.

რა ვიდეო გავრცელდა სოციალურ ქსელში?

ვიდეოები სოციალურ ქსელში რუსულენოვანმა მომხმარებელმა, ვალენტინა პაზლევიჩმა გამოაქვეყნა.

პირველ ვიდეოში ის ამბობს: "მსოფლიოში სტილით ყველაზე გამორჩეულ პოლიტიკოსთან, კახა კალაძესთან შეხვედრის შანსი უმნიშვნელოდ მცირეა, მაგრამ არასდროს ნულის ტოლი".

მეორე ვიდეოში კი ბლოგერი თბილისის მერს რუსულად ესაუბრება. კალაძე მას ქართულ სტუმართმოყვარეობაზე, კერძებსა და ტურიზმზე უყვება:

"ქართველისთვის სტუმარი ღვთისაა. ამიტომ ჩვენ ყოველთვის გვახარებს, როდესაც სხვადასხვა ქვეყნიდან ტურისტები ჩამოდიან... ჩვენთან ღვინოც და ქართული სამზარეულოც ძალიან გემრიელია"

ბლოგერის შენიშვნაზე, რომ ქართული სამზარეულოს გამო წონაში იმატებს, კალაძემ უპასუხა, რომ მისი საყვარელი კერძები ხინკალი, ქაბაბი, იმერული და აჭარული ხაჭაპურია, ასევე აღნიშნა, რომ ერთი ჭიქა წითელი ღვინო ორგანიზმისთვის სასარგებლოა და სტუმრებს საქართველოში ჩამოსვლისკენ კიდევ ერთხელ მოუწოდა.