ჩრდილოეთ უელსში 26 წლის კაცი მას შემდეგ დააკავეს, რაც ცელიანი სიკვდილის კოსტიუმში გამოწყობილი საავადმყოფოს სახურავზე აძვრა. დენბიშირის კლინიკის სახურავიდან გადმომდგარი ლეონ გილესპი სამედიცინო პერსონალსა და პაციენტებს აშტერდებოდა. მას შავი მოსასხამი ეცვა და და ხელში ცელის მსგავსი საგანი ეჭირა. ინციდენტის გამო ადგილზე დაუყოვნებლივ გამოიძახეს ჩრდილოეთ უელსის პოლიცია და სახანძრო-სამაშველო სამსახური.

პოლიციის გამოჩენამდე გილესპი სახურავზე თითქმის 50 წუთის განმავლობაში იდგა და ეზოში ადამიანების დანახვისას უცნაურ ხმებს გამოსცემდა. სახურავიდან ჩამოყვანის შემდეგ, გილესპი დააკავეს და ბრალი ჯანდაცვის ეროვნული სამსახურის კუთვნილ ტერიტორიაზე მუშაობის შეფერხებისა და წესრიგის დარღვევისთვის წაუყენეს.

თუმცა, ამ ისტორიაში კიდევ უფრო მოულოდნელი დაკავებულის ჩვენება აღმოჩნდა: გილესპი დაბეჯითებით ამტკიცებდა, რომ ცელიანი სიკვდილის ფორმა საერთოდ არ ეცვა და მისი კოსტიუმი სინამდვილეში ყვავს განასახიერებდა. საბოლოოდ, მან წესრიგის დარღვევის ბრალდება აღიარა, რის გამოც ჯარიმის სახით $260-ის გადახდა დაეკისრა.

როგორც გაირკვა, საავადმყოფოში მომხდარი ინციდენტი გილესპის ერთადერთი სამართალდარღვევა არ ყოფილა. გავრცელებული ინფორმაციით, დაკავებულმა ისიც აღიარა, რომ მარტში ზოომაღაზიიდან კატის საკვები და ქვიშა, ხოლო მაისში სუპერმარკეტიდან საკვები პროდუქტები და სასმელები მოიპარა.