რუსეთში სახელმწიფო დუმის არჩევნების სამდღიანი კენჭისყრა დასრულდა. რუსეთის ფედერაციის მე-9 მოწვევის სახელმწიფო დუმის არჩევნებში პარტიამ ერთიანი რუსეთი ხმების 57.86% მოიპოვა. ოფიციალური მონაცემებით, არჩევნები ბოლო 15 წლის განმავლობაში რეკორდული აქტივობით ჩატარდა. მიუხედავად ამისა, დამოუკიდებელი საარჩევნო ანალიტიკოსები მიიჩნევენ, რომ ეს შესაძლოა ამომრჩეველთა მოსყიდვის, გაყალბებისა და საბიუჯეტო სექტორის თანამშრომელთა ადმინისტრაციული მობილიზაციის ნიშანი იყოს. ამის შესახებ ინფორმაციას BBC ავრცელებს.

ორშაბათის დილის მდგომარეობით, 5%-იანი ბარიერი ოთხმა პარტიამ გადალახა: ერთიანი რუსეთი თავის საკონსტიტუციო უმრავლესობას ინარჩუნებს და კიდევ უფრო აძლიერებს, ხოლო სამართლიანი რუსეთი მინიმუმს რამდენიმე მეასედი პროცენტით ჩამორჩება.

კვირას, საარჩევნო უბნების დახურვამდე ცოტა ხნით ადრე (მოსკოვის დროით 20:55 საათზე) გამოქვეყნებული წინასწარი მონაცემებით, ამომრჩეველთა აქტივობამ 56.66% შეადგინა. ეს მაჩვენებელი 2021 წლის სახელმწიფო დუმის იმ არჩევნების აქტივობას აღემატება, რომელიც უკრაინასთან სრულმასშტაბიანი ომის დაწყებამდე გაიმართა (მაშინ ხმა ამომრჩეველთა 51.72%-მა მისცა).

ორშაბათის დილისთვის, ბიულეტენების 90.43%-ის დამუშავების შემდეგ, ხმები შემდეგნაირად განაწილდა:

• ერთიანი რუსეთი — 57.86%
• რუსეთის ფედერაციის კომუნისტური პარტია — 13.84%
• რუსეთის ლიბერალ-დემოკრატიული პარტია — 8.9%
• ახალი ხალხი — 7.94%
• სამართლიანი რუსეთი — 4.95%

BBC წერს, რომ წინა სახელმწიფო დუმასა და ახალ პარლამენტშიც სწორედ ეს ხუთი პარტია იყო წარმოდგენილი. შესაბამისად, ამჟამად მთავარი ინტრიგა ის არის, შეძლებს თუ არა სამართლიანი რუსეთი მე-9 მოწვევის დუმაში მოხვედრას. წინასწარი შედეგების მიხედვით, სხვა პარტიები 5%-იან ბარიერს ვერ ლახავენ.

"ინტერფაქსის" გამოთვლებით, ერთიანი რუსეთი საკონსტიტუციო უმრავლესობაზე (301-ზე მეტ მანდატზე) აცხადებს პრეტენზიას: პარტიული სიებით მიღებული შედეგი მას დაახლოებით 125 მანდატს მისცემს, ის ასევე იმარჯვებს 181 ერთმანდატიან ოლქში და, საბოლოო ჯამში, როგორც უმსხვილესი პარტია, დამატებით რამდენიმე სავარძელს მიიღებს იმ პარტიების მანდატების გადააწილების შედეგად, რომლებმაც საარჩევნო ბარიერი ვერ გადალახეს.

წინასწარი მონაცემებით, ერთიანი რუსეთის გარდა, ერთმანდატიან ოლქებში მანდატების მოპოვების შანსი აქვთ:

• რუსეთის ფედერაციის კომუნისტური პარტია-ს (მათი კანდიდატები ლიდერობენ ხუთ ოლქში)
• სამართლიან რუსეთს (ოთხი ოლქი)
• რუსეთის ლიბერალ-დემოკრატიული პარტია-ს (ორი ოლქი)
• პარტია სამშობლოს (ერთი ოლქი)

გარდა ამისა, დამოუკიდებელმა კანდიდატებმა პირველი ადგილი კიდევ ოთხ სხვა ოლქში დაიკავეს.

აღსანიშნავია, რომ დისტანციური ელექტრონული კენჭისყრის შედეგები იმ რეგიონებში, სადაც ის ჩატარდა (კალინგრადის ოლქის გარდა, სადაც ხმების დათვლა ჯერ კიდევ გრძელდება), ქვეყნის მასშტაბით არსებული წინასწარი შედეგებისან განსხვავდება. ერთიან რუსეთს ელექტრონულ ხმებში ოდნავ ნაკლები — 49.6% ჰქონდა, მეორე ადგილზე კი ახალი ხალხი გავიდა 15.42%-ით. კპრფ-მ მიიღო 12%, ლდპრ-მ — 10.79%, ხოლო სამართლიანმა რუსეთმა — 5.75%.

Deutsche Welle, წერს, რომ ამჯერად, რუსეთის პარლამენტის სამდღიანი არჩევნები უკრაინის რუსეთის მიერ ოკუპირებულ ტერიტორიებზეც ჩატარდა. ერთადერთი მსხვილი პარტია, რომელიც ომს ეწინააღმდეგებოდა — "იაბლოკო", არჩევნებიდან მოხსნეს. გერმანიამ და ევროპულმა კავშირმა რუსეთში გამართული საპარლამენტო არჩევნები გააკრიტიკეს და მათ "ინსცენირებული ხასიათის" და ოპოზიციის წინააღმდეგ მიმართული რეპრესიები უწოდეს.

უკრაინული მედია წერს, რომ რუსეთში, სახელმწიფო დუმისა და რეგიონული პარლამენტების სამდღიანი არჩევნების პერიოდში (18-21 სექტემბერი), ე.წ. "უსაფრთხოების ზომებიდან" გამომდინარე, შესაძლოა მობილური კავშირგაბმულობა და ინტერნეტსერვისები გათიშულიყო. ამავდროულად, ქვეყნის მასშტაბით დაფიქსირდებოდა დამკვირვებლებზე სისტემატური ზეწოლა, საბიუჯეტო სექტორის თანამშრომლების იძულება და ფართომასშტაბიანი საარჩევნო გაყალბებები.

უკრაინული მედია ასევე წერს, რომ სახელმწიფო ავტომატიზებული სისტემა — არჩევნების განახლებული 2.0 ვერსია, რომელიც 2026 წლის რუსეთის ფედერალურ არჩევნებში პირველად ამოქმედდა სრული დატვირთვით, შეიცავს საბოლოო ოქმების პირდაპირი ჩანაცვლების, ამომრჩეველთა სიების მანიპულაციისა და ელექტრონული კენჭისყრის გადაუმოწმებელი შედეგების ატვირთვის ინსტრუმენტებს.

რუსეთის ცენტრალური საარჩევნო კომისიის თავმჯდომარემ, ელა პამფილოვამ განაცხადა, რომ 19 სექტემბრის ღამეს მოსკოვის საარჩევნო სისტემა, სავარაუდოდ, ფართომასშტაბიანი და ინტენსიური კიბერშეტევის სამიზნე გახდა.

17 სექტემბერს უკრაინის უმაღლესმა რადამ უცხო ქვეყნების პარლამენტებს, მთავრობებს, საერთაშორისო ორგანიზაციებსა და საპარლამენტო ასამბლეებს მოუწოდა, დაეგმოთ რუსეთის ფედერაციის სახელმწიფო დუმის ე.წ. არჩევნების ჩატარება უკრაინის დროებით ოკუპირებულ ტერიტორიებზე და არ ეცნოთ მათი შედეგები.

უკრაინის საგარეო საქმეთა სამინისტრომ საერთაშორისო საზოგადოებას მოუწოდა, არ ცნოს რუსეთის სახელმწიფო დუმისა და რეგიონული პარლამენტების არჩევნები, რომლებსაც აგრესორი სახელმწიფო, მათ შორის, უკრაინის ოკუპირებულ ტერიტორიებზე ატარებს.